Almatyda atmosferalyq aýany qorǵaý qaǵıdasynyń jobasy ázirlendi. Kelesi jyldyń basynda ony Máslıhattyń qaraýyna engizý josparlanýda. Qujat aýany lastaıtyn stasıonarlyq jáne jyljymaly kózderdiń jumysyna qoıylatyn talaptardy qatańdatýdy kózdeıdi, dep habarlaıdy aqshamnews.kz
Búgingi tańda Almatyda qaldyqtardyń eń kóp úlesi avtokólikke – 60% jáne 27% ónerkásiptik kásiporyndarǵa tıesili. Teris kórsetkishterdi tómendetý maqsatynda qala basshylyǵy dızel otynymen júretin avtobýstar satyp alýǵa tyıym saldy. Qazirgi ýaqytta gazben júretin 770 avtobýs, 115 elektr avtobýsy jáne troleıbýs parkin tolyǵymen jańartqan 112 troleıbýs satyp alyndy.
«Kelesi jyly biz gazben júretin taǵy 600 avtobýs pen 200 elektr avtobýsyn satyp alýdy josparlap otyrmyz. Osynyń arqasynda ekologıalyq taza qoǵamdyq kóliktiń úlesi 70%-ǵa deıin kóbeıedi. Elektr qýattaý stansalarynyń jelisin keńeıtý maqsatynda bıyl jeke ınvestorlar tartyldy. Eger búginde qalada 300-den astam stansa bolsa, kelesi jyly jeke ınvestısıalar esebinen olardyń sany eki esege artady. Sondaı-aq 2-JEO gazǵa kóshirý boıynsha jumystar júrgizilýde. Kelesi jyldyń jeltoqsan aıynan bastap 2026 jyly tolyq aıaqtalatyn keshenderdi kezeń-kezeńimen iske qosý josparlanýda. JEO-ny gazǵa aýystyrýdyń arqasynda qaldyqtar 90%-ǵa tómendetiletin bolady. Sonymen qatar biz qorshaǵan ortany qorǵaýdy zańnamalyq retteý boıynsha júıeli túrde jumys júrgizip kelemiz. Osy jyly bizdiń bastamamyz boıynsha Almaty qalasynyń Máslıhatyna atmosferalyq aýany qorǵaý qaǵıdalaryn bekitý quzyreti berildi. Onyń jobasy ázirlendi jáne birinshi toqsanda biz ony bekitý úshin Máslıhatqa engizemiz», — dep atap ótti Almaty qalasy ákiminiń orynbasary Álisher Ábdiqadyrov.