Bul – kúzde elimizde ótetin 5-shi Dúnıejúzilik kóshpendiler oıynyna arnalǵan alǵashqy oqý-jattyǵý jıyny.
Ulttyq sport qaýymdastyǵynyń Asyq atý federasıasy Almatyda oqý-jattyǵý jıynyn ótkizip jatyr, dep habarlaıdy almaty-akshamy.kz.
Elimizdiń birneshe óńirinen kelgen ulttyq qurama sapyndaǵy asyqshylar 12 kún boıy asyq atý men bes asyqtan sheberlikterin shyńdaıdy.
Bul – kúzde elimizde ótetin 5-shi Dúnıejúzilik kóshpendiler oıynyna arnalǵan alǵashqy oqý-jattyǵý jıyny. Ortalyq armıa sport klýbynyń bazasynda ótip jatqan jattyǵýǵa 37 sportshy kelse, onyń – 26-sy asyqshy jigitter, 11-i – besasyqshy qyzdar.
Ulttyq quramanyń bas bapkeri Jomart Sabyrjanulynyń aıtýynsha, munda asyqshylardyń alańsyz jattyǵý jasaýyna barlyq jaǵdaı jasalǵan.
Alǵashqy 12 kúndik oqý-jattyǵý jıynymyz óte sátti bastaldy. Aldymyzda áli Shymkent, Kókshetaý qalalary men Sholpan-Ata (Qyrǵyzstan) jáne Antalıada (Túrkıa) ótetin tórt jıyn bar. Dúnıejúzilik kóshpendiler oıyndarynda quramamyz el namysyn abyroımen qorǵap, asyq atý men bes asyqtan top jarady dep senemiz. Dúbirli dodada qyrǵyzdyń ordo oıynynan da synǵa túsemiz. Sondyqtan Sholpan-atada ordo oıynynan oqý-jattyǵý jıyny ótedi, – dedi Jomart Sabyrjanuly.
Óz kezeginde asyq atýdan Pavlodar oblysynyń aǵa jattyqtyrýshysy, álem jáne Eýrazıa kýboginiń jeńimpazy, «Altyn tuǵyr» ıegeri Qalıbek Qýanuly kún ótken saıyn qurama músheleriniń sheberlikteri shyńdalyp kele jatqanyn alǵa tartty.
Mynaý myqty dep eshqaısysyn bólip-jara almaımyz. Báriniń deńgeıi birdeı. Fızıkalyq daıyndyqtary joǵary. Sportshylardy psıhologıalyq turǵydan da daıyndap jatyrmyz. Maqsatymyz – álem kýbogy, álem jáne Azıa chempıonaty men Kóshpendiler oıyndarynda úzdik óner kórsetý, – dedi bapker.
Dúbirli dodaǵa daıyndyqtaryn pysyqtap jatqandardyń qatarynda Aqmola oblysynan kelgen besasyqshy Kógershin Dýman da bar. Ol – búginde Kókshetaý joǵary medısınalyq kolejiniń tórtinshi kýrs stýdenti. Buǵan deıin Álem jáne Qazaqstan kýbogynyń ıegeri, Eýrazıa kýbogynyń kúmis júldegeri atanyp úlgergen Kógershinniń besasyqpen aınalysqanyna bes jyl bolǵan. Ol bolashaǵyn ulttyq sportpen baılanystyryp, besasyqtan bapker bolýdy kózdep otyr.
Osy oqý-jattyǵý jıynynyń qorytyndysy boıynsha bas bapkerdiń sheshimimen dúbirli dodalarda el namysyn qorǵaıtyn asyqshylar belgili bolady.