Joldy túgel ashýǵa áli múmkindik joq
Almaty-Bishkek tas jolyndaǵy estakada qurylysynyń saǵyzsha sozylýy keptelis týdyryp tur. Osylaı shaǵym aıtqan kólik júrgizýshileri 4 jolaqty joldyń qurylys kesirinen tarylyp qalǵanyn aıtady. Tar jermen syǵylyp ótetin kólikter saldarynan jıi soqtyǵysyp qalady, dep habarlaıdy Almaty-akshamy.kz Almaty.tv-ge silteme jasap.
Saǵattap kepteliste turyp, sabyry sarqylǵan júrgizýshiler másele kópir qurylysynda dep shaǵymdanýda. Olar jol ortasyna deıin qoıylǵan baǵanalardyń turǵanyna da uzaq ýaqyt bolǵanyn aıtty.
«Kópir qurylysy bitken joq. Baıaǵyda bitetin jumys uzaqqa sozylyp ketti. Keptelis saldarynan jol-kólik oqıǵasy jıi bolady. Erte shyqqannyń ózinde jumysqa keshigip baramyz», – dedi oblys turǵyny Oljas Daıyrman.
- «Asyl arman» turǵyn úı kesheninde turamyn. Kúnde osynda kelip, istegen jumystaryna qarap turamyn. Armatýra toqýdyń eshqandaı qıyndyǵy joq, oǵan tehnologıa kerek emes. Jumysty tym uzaqqa soqyp jiberdi», – dedi qala turǵyny Aıat Malǵajyn.
Túsirilim kezinde de "Altyn Orda" bazary mańyndaǵy bul tas jolda kólikterdiń soqtyǵysyp qalǵanyn baıqadyq. Kólik júrgizýshileriniń aıtýynsha, estakadany aınalyp ótetin basqa jol joq.
"Almaty-Bishkek tas jolyndaǵy «Asyl Arman» turǵyn úı kesheni men «Altyn Orda» bazary arasyndaǵy kólik qozǵalysyn retteý ońaı emes", - deıdi jol patrúldik polısıasynyń qyzmetkerleri. Olardyń aıtýynsha, erejeni saqtamaıtyn júrgizýshilerdiń kesirinen kólikter de jıi soqtyǵysyp qalady eken.
«Bul jerde polısıanyń kómegi eshqandaı ról oınamaıdy. Myna jerde jóndeý jumystary júrip jatyr. Kópir salynyp jatyr, ar jaqtan kólik tórt jolaqpen keledi de qysylady. Sebebi beri jaǵynda tek eki jolaqpen júre alady. Keptelis, kúnine 10-nan artyq jol-kólik oqıǵasy tirkeledi», – dedi polısıa departamenti patrúldik polısıa batalóny qyzmetiniń aǵa ınspektory Arnur Turdaqynov.
Al atalǵan 160 metrlik estakada qurylysyna 77 adam jumyldyryldy degen jaýapty kompanıa eki aýysymmen jumys istep jatqandaryn aıtady. Alaıda aýa raıyna baılanysty qıyndyq týyndaǵanyn jasyrmady.
«Iá, keptelis bolady. Beton jasaǵanda, tek eki jolaqty qaldyrǵanbyz. Qazir jumys bitti ǵoı, endi alyp tastaǵannan soń keptelis bolmaıdy.2023 jyly qyrkúıek aıynda jumys aıaqtaımyz», – dedi «QazAvtoJol»UK» AQ fılıaly dırektorynyń orynbasary Nurjan Tańatarov.
Joldy túgel ashýǵa áli múmkindik joq. Búginnen bastap temir tireýishter shetinen alynyp tastalyp jatyr. Endi qurylys tolyq aıaqtalǵansha, temir tulpar tizgindegender tek eki jolaqpen ótýge májbúr.