Almaty qalasynyń Dostyq úıinde “Birlik pen kelisim jolyndaǵy 30 jyl” atty Qazaqstan halqy Assambleıasynyń qurylǵanyna 30 jyl tolýyna oraı memorıaldyq taqta ornatyldy.
Onyń ashylýy saltanatyna Almaty ákiminiń orynbasary Azamat Qaldybekov jáne Qazaqstan halqy Assambleıasynyń músheleri qatysty, dep habarlaıdy aqshamnews.kz
İs-shara barysynda Azamat Qaldybekov Memleket basshysy Qasym-Jomart Toqaevtyń quttyqtaý sózin oqydy. Sondaı-aq Almaty ákimdiginiń atynan jınalǵan qaýymdy mereıli kúnmen quttyqtady.
"1 naýryz - Alǵys aıtý kúni ári Qazaqstan halqy Assambleıasynyń 30 jyldyǵyn atap ótetin kún. Bul uıym elimizdegi beıbitshilik pen kelisimniń biregeı ınstıtýtyna aınaldy. Assambleıa qoǵamymyzdyń birligi men nyshanyna, Qazaqstannyń órkendeýi men turaqtylyǵynyń basty irgetasyna aınaldy", - dep atap ótti Almaty ákiminiń orynbasary.
Sonymen qatar is-shara barysynda Qazaqstan halqy Assambleıasynyń aqsaqaldary shahar basshysynyń atynan alǵys hattarmen marapattaldy.
Aıta keteıik, 1995 jyly 1 naýryz kúni Qazaqstan halqy Assambleıasynyń negizi qalanǵan bolatyn.