Almatyda Dúnıejúzilik Azamattyq qorǵanys kúnine oraı kórme uıymdastyryldy, dep habarlaıdy aqshamnews.kz
Dúnıejúzilik Azamattyq qorǵanys kúnine arnalǵan is-sharalar aıasynda Almaty qalasynyń Tótenshe jaǵdaılar departamenti Almaty qalasynyń qutqarý qyzmetimen jáne QR TJM aýmaqtyq bólimshelerimen birge «Astana» alańynda órt sóndirý, qutqarý jáne basqa da arnaıy qural-jabdyqtardyń kórmesin ótkizdi.
Kórmege kelgen almatylyqtar qalanyń avarıalyq-qutqarý kúshteriniń múmkindikterimen, qutqarý jáne medısınalyq tehnıka men jabdyqtarymen tanysty. Sondaı-aq alańda medısına qyzmetkerleri master-klass ótkizip, ashyq túrde dene jaraqattary bar adamdarǵa qalaı kómek kórsetiletinin kórsetti.
- Demonstrasıalyq kórme - azamattyq qorǵaý jáne qaýipsizdik mádenıetin qalyptastyrý salasyndaǵy bilimdi nasıhattaý maqsatynda uıymdastyrylady, sondaı-aq qala turǵyndaryn qutqarý qyzmetteri men quralymdardyń múmkindikterimen tanystyrý úshin ótkiziledi, - dedi kórme uıymdastyrýshylary.
Alańda jer silkinisteriniń sımýlátory qoıyldy. Bul qurylǵy jer silkinisiniń kóldeneń jáne tik dúmpýlerin uqsatatyn úı bólmesiniń maketinde kórsetilgen. Oǵan qosa, qala turǵyndary men qonaqtary 90 metr bıiktikten adamdardy qutqarýǵa arnalǵan Qazaqstandaǵy eń bıik kótergishti tamashalaı aldy.
Aıta keteıik, Halyqaralyq azamattyq qorǵanys uıymy (HAQU) Bas Assambleıasynyń sheshimimen 1990 jyldan bastap 1 naýryz kúni Dúnıejúzilik Azamattyq qorǵanys kúni bolyp atap ótedi. Qazaqstan Respýblıkasy 1996 jyly HAQU músheligine kirip, halyqty, aýmaqty jáne sharýashylyq júrgizý obektilerdi tabıǵı jáne tehnogendik sıpattaǵy tótenshe jaǵdaılardan qorǵaý máselelerin sheshý boıynsha halyqaralyq deńgeıde belsendi yntymaqtastyqty júzege asyrady.