Otan qorǵaýshy kúnine oraı ótetin merekelik sharalar Almatyda dástúrli túrde birinshi qorǵanys mınıstri, Uly Otan soǵysynyń ardageri, birinshi Halyq qaharmany armıa generaly Saǵadat Nurmaǵambetov turǵan úıdiń janyna gúl shoqtaryn qoıýdan bastaldy.
İs-sharaǵa Desanttyq-shabýyldaý áskerleriniń qolbasshysy – Almaty óńirlik garnızonynyń bastyǵy general-maıor Almaz Jumakeev, Qazaqstan Qarýly kúshteriniń ardagerleri, áskerı oqý oryndarynyń kýrsanttary jáne "Jas sarbaz" respýblıkalyq áskerı-patrıottyq qozǵalysynyń tárbıelenýshileri qatysty, dep habarlaıdy Almaty-akshamy.kz Qorǵanys mınıstrligine silteme jasap.
Saǵadat Nurmaǵambetov talaı synnan ótkenmen, taǵdyry jarqyn adam. Ata-anasynan erte aıyrylyp qalyp, aǵasy Saǵıttiń otbasynda tárbıelenedi. Uly Otan soǵysy bastalǵan kezde úlken aǵasy Saǵıt birinshi bolyp soǵysqa attanyp, kóp uzamaı qaza tapty. Odan keıingi shaqyrtý Saǵadatqa keldi. Ol Túrikmenstandaǵy pýlemet ýchlıshesin bitirip, 1942 jyly maıdanǵa jiberildi. Soltústik Kavkazdan Berlınge deıin jetip, batalón komandıri kezinde jeńisti qarsy aldy. Onyń batalóny gestapo shtabyn basyp alý jáne Reıhstagqa shabýyl jasaý kezinde qandy shaıqastarǵa qatysty. 1945 jyly Saǵadat Nurmaǵambetov Keńes Odaǵynyń Batyry ataǵyna ıe boldy.
Saǵadat Qojahmetuly Nurmaǵambetov ómir súrgen úıdiń janyndaǵy memorıaldyq taqtaǵa gúl shoqtaryn qoıǵannan keıin garnızon áskerı qyzmetshileri batyrdyń erligine qurmet kórsetip, saltanatty marshpen júrip ótti.
«Qarýly kúshtermen baılanysty barlyq merekelik is-sharalar árqashan Saǵadat Qojahmetuly Nurmaǵambetovti eske alýdan bastalady. Bıylǵy jyl erekshe. 25 mamyr – onyń 100 jas mereıtoıy. Armıa generaly Nurmaǵambetovtiń táýelsiz Qazaqstannyń Qarýly kúshterin qurýdaǵy sińirgen eńbegi zor, sondyqtan biz ony jadymyzda saqtap, qurmetteýge tıispiz», – dedi eks-qorǵanys mınıstri general-polkovnık Álibek Qasymov.
Saǵadat Qojahmetulynyń nemeresi Aıjan Nurmaǵambetova atasy týraly estelikterin áńgimelep, atasy úshin Paryz, Ar-namys pen Erlik jaı sózder ǵana emes ekenin aıtty. Bul qasıetter atamnyń ustanymy boldy. Ol tek baǵynystylarǵa ǵana emes, ózine de qatal, talapshyl boldy dedi.
İs-shara ári qaraı 28 panfılovshy-gvardıashylar saıabaǵynda jalǵasty, onda Almaty óńirlik garnızonynyń basshylyǵy men Qarýly kúshterdiń ardagerleri Máńgilik alaýǵa gúl shoqtaryn qoıyp, garnızonnyń áskerı qyzmetshileri saltanatty marshpen ótti.