29219 áskerı bóliminiń bazasynda tyldyq qamtamasyz etý mamandarynyń áskerı jıyndary ótip jatyr.
İs-sharalar áskerı mindettilerdiń praktıkalyq daǵdylaryn jetildirýge, áskerı daıyndyqtyń talap etiletin deńgeıin jáne olardy qoldanýǵa ázirligin qoldaýǵa baǵyttalǵan, dep habarlaıdy Almaty-akshamy.kz Qorǵanys mınıstrligine silteme jasap.
Tyldyq qamtamasyz etý salasynda arnaýly mamandardy daıyndaý júrgizilýde. Olardyń qatarynda aspazshy, naýbaıshy, otyn jabdyqtaryn, kıim-keshek zattaryn jóndeý sheberleri, kir jýý, kıim sheberhanalarynyń bastyqtary, veterınarlyq feldsherler men zerthanashylar bar.
Oqý materıaldyq-tehnıkalyq baza bilim alýshylarǵa tyldaǵy qamtamasyz etý mindetterin oryndaý úshin qajetti bilim men daǵdylar qoryn berýge múmkindik beredi. Áskerı mindettilerdiń turmysyn uıymdastyrý úshin áskerı sharýashylyqtyń barlyq elementteri ornalastyrylǵan, mádenı jáne sporttyq is-sharalar qarastyrylǵan.
– Jıynǵa medısınalyq komısıadan sátti ótken 120-dan asa adam tartylǵan. Tájirıbeli nusqaýshylardyń basshylyǵymen áskerı mindettiler áskerı sharýashylyq júrgizýge, tamaqtanýdy uıymdastyrýǵa, zattaı múlikpen qamtamasyz etýge jáne materıaldyq-tehnıkalyq qamtamasyz etýdiń basqa da máselelerine oqytylatyn bolady. Oqý arnaıy trenajerlardy qoldaný arqyly ótetinin aıta ketý kerek, – dep túsindirdi jıyn bastyǵy, 29219 áskerı bóliminiń komandıri polkovnık Mırhat Oǵyzbaev.
Tıisti áskerı-eseptik mamandyq boıynsha jıyndardyń oqý baǵdarlamasyn ıgerý emtıhandar men synaqtardy tapsyrý jolymen tekseriletin bolady. Baǵdarlamany sátti ıgergenderge kezekti áskerı ataq beriledi.
Jıynǵa shaqyrylǵan zapastaǵy efreıtor Rashıt Begenbaı óz josparlaryn ortaǵa saldy.
– Ýaqytysynda merzimdi qyzmetimdi ótedim. Bolashaqta kelisimshart boıynsha áskerı qyzmetke kirýdi josparlap otyrmyn. Sondyqtan qazirgi jıyndar men úshin óz daǵdylarymdy jetildirý turǵysynan óte paıdaly bolady, – dedi ol.
Jıyndar 9 shildege deıin jalǵasady. Osy kezeńde áskerı mindettilerdiń jumys orny men atqaratyn laýazymy saqtalady. Respýblıkalyq búdjet esebinen olarǵa ortasha aılyq jalaqy tólenedi.