Almatylyq Erik Dúsembaev qolyna túsken kez kelgen zattan kóz súısiner keremet buıymdar jasaıdy. Ol úshin aınaladaǵy zattyń barlyǵy kádege jararlyq. Temirden túıin túıip, aǵashtan oıý oıatyn sheber jigit ózi turatyn úıdiń aýlasyn da gúlmen kómkerip, jasyl jelekpen jaıqaltyp qoıǵan.
Ol otbasyndaǵy tuńǵysh bala. Úılengen soń bólek shyǵyp, 2014 jyly Bostandyq aýdanyna qarasty Radostoves kóshesindegi 4 qabatty turǵyn úıdiń birinshi qabatynan páter alǵan. Aıtýynsha, alǵash kóship kelgende terezesiniń tusy jaı ǵana bos jatqan alań bolǵan eken. Mundaıda qoly sheber jigit qarap otyrsyn ba, jubaıy ekeýi ózderine tıesili alaqandaı jerdi tazalap kózdiń jaýyn alatyndaı shaǵyn saıabaqqa aınaldyrypty. Búginde raýshan gúlderi jaınap, aınalasy tastardan jasalǵan túrli músindermen kómkerilgen alańqaı kez kelgendi ózine qaratpaı qoımaıdy. Ásirese, keshki salqynda aýlanyń janynan ótkender toqtap, sýretke túsýden jalyqpaıdy eken.
– Es bilgeli qalam men qaryndashqa áýes bolyp, boıym jetken jerdiń barlyǵyn syza beredi ekenmin. Mektepte oqyǵanda da jeke sheberhana berip, sol jerde mekteptiń tapsyrysy boıynsha zattar jasaıtynmyn. Al joǵary synypqa barǵanda lıseıge talapkerlerdi tartý úshin komısıa kelip, bizge sýret saldyratyn. Sonda meniń sýretterim kóńilderinen shyqsa kerek, T.Júrgenov atyndaǵy Óner akademıasynyń janyndaǵy lıseıge birden qabyldandym. Keıin kolejin oqydym, odan keıin akademıany, magıstratýrany bitirdim. Osylaısha dáriger bolyp shyǵatyndaı 12 jyl ýaqytymdy berip, oqýymdy aıaqtadym. Dıplomdyq jumysymdy qorǵaýǵa teatrǵa kelip, keıin «bizde sýretshi bolyńyz» degen usynys bolǵan soń, sol teatrda qoıýshy-bas sýretshi bolyp, óner jolynda 15 jyldaı qyzmet ettim. Sol kezde zaman talabyna ilesip, naryq talabyna beıimdelý úshin jeke kásip bastaǵan bolatynmyn. Biraq eki jumysty qatar alyp júrý qıyndaý bolǵan soń, jeke kásibimdi jalǵastyramyn dep sheshtim, – deıdi ol ózi jaıynda suraǵanymyzda.
Erik Dúsembaev – bıyl «Almaty bizdiń ortaq úıimiz» naýqany aıasynda ótken saıysta Bostandyq aýdany boıynsha «Úzdik aýla» baıqaýynyń Bas júldesin ıelengen jeńimpaz.
– Birde jubaıym ekeýmiz aýyldan kele jatyp, jol boıyndaǵy gúlderge qatty qyzyqtyq. Sóıtip aýlamyzǵa birden 27 raýshan otyrǵyzdyq. Keıin terekter ákelip ektik. Aýlamyz ásirese, jazda ádemi! Keıde terezeden qarap súısinetinim bar. Eńbektengen adam ǵana armanyna jetedi dep jatady ǵoı. Bul júlde bizdiń kóp jylǵy mańdaı terimizdiń jemisi dep bilemin. Barlyǵy oılamaǵan jerden boldy. Jańalyqtardan estip, baıqaýǵa qujat tapsyrǵan soń, quramynda depýtattar men aýdan ákimdiginiń kóriktendirý bóliminiń qyzmetkerleri bar 8 adamnan turatyn komısıa músheleri aýlamyzdy kórýge keldi. Keıin 6 kúnnen keıin ákimdikten habarlasty. Bardyq. Úshinshi orynnan joǵary qaraı júldegerler anyqtalyp, sońynan Bas júlde dep meniń aty-jónimdi ataǵanda qatty qýandym, – deıdi jeńimpaz jigit.
Eriktiń jubaıy Saltanat ta óner adamy, ıaǵnı ol da qoıýshy-sýretshi. Qazir Muhamed esimdi kishkentaı bópeleriniń kútimimen dekrettik demalysta otyr.
«Jigitke jeti óner de az» degen. Biz esik aldyndaǵy tamsanbaýǵa bolmaıtyn ásemdikten Eriktiń qoltańbasyn kórdik. Joqtan bar jasaı alatyn azamattyń alaqandaı aýlasynda bári bar. Shyǵarmashylyq adamy bolǵan soń shyǵar, syldyrap aqqan bulaq pen sýburqaq ta, saırap turǵan qus ta, symdaı tartylǵan aryq ta shaǵyn saıabaqtyń ishinde erekshe talǵammen úılesip tur. Samaladaı jaryq shamdary qosylǵanda bul jer tipti tamasha eken!
Endeshe, kópqabatty turǵyn úı aýlasyn óz eńbekterimen jasyl-jelekke aınaldyryp, Almatydaı alyp shahardyń kógaldanýyna úles qosyp júrgen bul jas otbasy kópke úlgi bolarlyqtaı-aq...
P.S. Sheber jigittiń «shedevrleri» munymen bitpek emes. Erik Serikulynyń armany da, alǵa qoıǵan maqsaty da kóp. Qazirgi tańda ol bolashaqta boı kóteretin kıiz úı úlgisindegi ózi turatyn úıdiń maketin jasaýmen aınalysyp jatyr. İske sát deımiz.
