Osy maqsatta QR Qarýly kúshteriniń Bas áskerı-medısınalyq basqarmasy beıindi joǵary oqý ornyn qurý jobasyn daıyndady.
Qazirgi ýaqytta joǵary medısınalyq bilim berý jáne áskerı ınternatýra baǵdarlamalary boıynsha áskerı dárigerlerdi Aqtóbe qalasyndaǵy Áýe qorǵanysy kúshteriniń áskerı ınstıtýty bazasynda Marat Ospanov atyndaǵy Batys Qazaqstan medısına ýnıversıtetimen birlesip daıyndaıdy. Al joǵary oqý ornynan keıingi medısınalyq bilim berý baǵdarlamasy boıynsha áskerı-medısınalyq kadrlardy daıyndaý «Astana» medısınalyq ýnıversıtetimen akademıalyq utqyrlyq sheńberinde QR Ulttyq qorǵanys ýnıversıtetiniń áskerı medısına kafedrasynyń bazasynda júzege asyrylady, dep habarlaıdy aqshamnews.kz.
Halyqaralyq yntymaqtastyq jelisi boıynsha Reseıde, Ózbekstanda, Armenıada, Qytaıda jáne Túrkıada joǵary jáne joǵary oqý ornynan keıingi medısınalyq bilim berý baǵdarlamalary boıynsha mamandar daıarlanady. Shetelde áskerı medısınalyq bilim alý tildik kedergilerdiń, ulttyq jáne mádenı aıyrmashylyqtardyń bolýymen, sondaı-aq dıplomdy taný rásimderiniń erekshelikterimen baılanysty ekenin atap ótken jón.
Jobany iske asyrý qolda bar mekemelerdi qaıta uıymdastyrýdy, uıymdastyrý sharalaryn júrgizýdi, qajetti ınfraqurylymdy, akademıanyń oqý-materıaldyq bazasyn qurýdy, bilim berý baǵdarlamalaryn ázirleýdi jáne lısenzıa alýdy talap etedi.
Jańa bilim berý mekemesi Almaty qalasyndaǵy Qorǵanys mınıstrliginiń Áskerı medısına ortalyǵy bazasynda qurylmaq.
İs-sharalar qorǵanys vedomstvosynyń múddeli qurylymdyq bólimshelerimen, Densaýlyq saqtaý, Ǵylym jáne joǵary bilim mınıstrlikterimen, «Qazaqstan-Reseı medısınalyq ýnıversıteti» memlekettik emes bilim berý mekemesi jáne «Áskerı medısına ardagerleri» qoǵamdyq birlestigimen birlesip ótkiziledi.