Túsindirme jumystary júrgizilip jatyr.
Almaty qalasy sanıtarlyq-epıdemıologıalyq baqylaý departamentiniń basshysy Jandarbek Bekshın Óńirlik komýnıkasıalar qyzmetiniń baspasóz konferensıasy barysynda Ashyq jobasynyń tıimdiligi týraly aıtty, dep habarlaıdy Almaty-akshamy.kz.
10 maýsymnan bastap monıtorıń qorytyndysy boıynsha karantın rejımin buzǵan 32 qala turǵynyna aıyppul salyndy.
«Búginde Ashyq júıesi juqtyrǵandardyń karantın rejımin saqtaý ári ınfeksıanyń taralýyna jol bermeýin baqylaýda. 2021 jyly 9 sáýir men 8 shilde aralyǵynda qoǵamdyq tamaqtaný nysandarynda skanerleý kezinde "qyzyl" mártebesi bar 323 adam tirkeldi. Fıtnes, baseınderde – 164, kınoteatrlarda – 79, SOSO – 24, HQKO kelýshilerdiń arasynda 21 adam anyqtaldy. Tártip buzýshylarǵa 10 maýsymnan bastap 30 AEK boıynsha 32 aıyppul salyndy. Ótken aptada 10 aıyppul salyndy», - dedi Jandarbek Bekshın.
Tekserýshiler kásipkerlerge sanıtarlyq talaptardy eskere otyryp, túsindirme jumystaryn júrgizdi.
«Biz taǵy da qala azamattarynan koronavırýstyń taralýyna qarsy kúreste kómek kórsetýdi, vaksınalaýdy jáne Ashyq júıesindegi nysandarǵa barý úshin mindetti túrde tirkeýden ótýdi suraımyz. Sondaı-aq KVI-ge test oń nátıje kórsetken jaǵdaıda áleýmettik jaýapkershilik tanytyp, qoǵamdyq oryndarǵa barmaýǵa shaqyramyz», – Jandarbek Bekshın.
Ashyq júıesiniń málimetteri boıynsha, Almaty qalasynda 2021 jyly 28 maýsym men 1 shilde aralyǵynda skanerleý nátıjesinde kásipkerlik nysandaryna kirgen kezde 28 turǵynnyń «qyzyl» mártebesi jáne 9 adamnyń «sary» mártebesi rastaldy.
Kóp jaǵdaıda «qyzyl» mártebe tamaqtaný oryndaryna, fıtnes-ortalyqtarǵa, kınoteatrlarǵa jáne áýejaıǵa kelýshilerden anyqtalýda.