Almatyda KVI aýrýynyń taralýy jalǵasýda. Epıdemıologıalyq jaǵdaı "delta" shtamymen baılanysty. Búgingi kúni 60 myń adam "delta" shtamyn juqtyrǵan. Bul týraly Óńirlik komýnıkasıalar qyzmetinde ótken baspasóz konferensıasynda qalanyń bas sanıtarlyq dárigeri Jandarbek Bekshın habarlady.
J. Bekshınniń aıtýynsha, ótken táýlikte Almatyda qaýipti indetti juqtyrǵan 638 jańa jaǵdaı tirkeldi. Bul – bıylǵy jazdaǵy antırekord. Maýsym aıynyń sońǵy kúnderi aýrýǵa shaldyqqan 600 jaǵdaı anyqtaldy. Bul koronavırýstyń "úndi" shtamynyń taralýymen baılanysty.
"Jyl basynan beri qalada koronavırýs ınfeksıasyn juqtyrǵan 60 myńnan astam jaǵdaı tirkeldi. Shilde aıynyń basynan beri 4 610 adam qaýipti indetke shaldyqqan. Al ótken aptada 3 085 jaǵdaı tirkeldi. Aldyńǵy aptamen salystyrǵanda 1,4 ese artyq", –dedi Almatynyń bas sanıtarlyq dárigeri.
J. Bekshın jańa "delta" nusqasy asa juqpaly jáne onyń klınıkalyq sıpaty aýyr ekenin aıtty.
"Ózderińiz biletindeı, kezekti zertteýlerde "delta" koronavırýsynyń aınalymdaǵy nusqalary 78-80% basym dárejede, "álfa" ("brıtandyq") 16%, SOVID-19 ("ýhan") 3% quraıdy.
Ótken 7 kúnde "sımptomdyq" naýqastardyń úles salmaǵy 2 esege, ıaǵnı 53%-dan 88%-ǵa deıin ósti. "Sımptomdardyń" úlesiniń artýy aýyr klınıkalyq kórinisterdi týdyratyn “delta” patogendik nusqasynyń taralýymen baılanysty.
J. Bekshın Almatydaǵy epıdemıologıalyq ahýalǵa júrgizilgen monıtorıń qorytyndylary týraly aıtty. Taldaý nátıjesinde, sońǵy eki aptada balalar men jastar vırýs juqtyrǵan. 14 jasqa deıingi balalardyń 13%-y ınfeksıa juqtyrýǵa beıim.
“Eń úlken alańdaýshylyq - 20 jastan 40 jasqa deıingi azamattar arasynda syrqattanýshylyqtyń ósýi 3,4%-ǵa ulǵaıyp, osy jyly eń joǵary deńgeıge jetti (39%). Sondaı-aq 40 pen 59 jas aralyǵynda 25% deńgeıdi quraıdy, ıaǵnı árbir 4-shi adam juqtyrǵan", – dedi J.Bekshın.
Osy derektermen qatar, 60 jastan asqan adamdar arasynda juqtyrýdyń úles salmaǵy olardyń ımmýndaý jáne ekpe alý nátıjesinde 1,6%-ǵa tómendegeni baıqalady.
Almatynyń bas sanıtarlyq dárigeri koronavırýstyń jańa shtamynyń tez taralatynyn ári qala turǵyndarynyń densaýlyǵy úshin qaýipti ekenin eskertti.
Sondaı-aq J. Bekshın betperde rejımin saqtaýdy ári ony jıi aýystyrý qajet ekendigin eskertti.