Almaty ákimi Erbolat Dosaev Almaly aýdanynda jumys sapary barysynda Volhovskaıa kóshesinde ornalasqan sýmen jabdyqtaýdyń apattyq sorǵy stansıasyna bardy, dep habarlaıdy almaty-akshamy.kz.
1987 jyly salynǵan sorǵy stansıasy 500-den astam turǵyny bar 4 kóp qabatty turǵyn úıdi aýyz sýmen qamtamasyz etedi.
Jalpy negizgi sorǵy stansıasy jumys istemeıdi, 32 jyl boıy jóndeýdiń bolmaýy nysandy apatty jaǵdaıǵa jetkizdi. Qazirgi ýaqytta tozyǵy 90% rezervtik sorǵy jumys isteıdi.
Qala basshysynyń tapsyrmasy boıynsha sorǵy stansıasyna tekserý júrgizilip, avarıalyq-qalpyna keltirý jumystarynyń smetalyq quny anyqtaldy. Jumysty osy jyldyń maýsym aıynda bastaý josparlanýda.
Almaty ákimi turǵyndardyń tynys - tirshiligin qamtamasyz etetin obektini rekonstrýksıalaýdy dereý qolǵa alýdy jáne jumystar aıaqtalǵannan keıin sorǵy stansıasyn «Almaty Sý» MKK balansyna berýdi, ony qalalyq júıeniń bir bóligine aınaldyrýdy tapsyrdy.
Aıta keterligi, 2023 jyly Almaly aýdanynda osyǵan uqsas taǵy eki apattyq nysan máselesi sheshildi. 26 jyl ishinde alǵash ret Aıtıev kóshesi, 13 mekenjaıdaǵy 26 jyl ishinde jóndeý kórmegen sýmen jabdyqtaý sorǵy stansıasy tolyǵymen qaıta jańartyldy. «Panorama» KJK sý burý jáne sýmen jabdyqtaý sorǵy stansıasynda avarıalyq-qalpyna keltirý jumystary júrgizildi. 1600-ge jýyq abonent turaqty jáne sapaly sýmen qamtamasyz etilgen.