Almatyda 50-shi jyldardan bastap paıdalanylatyn sý qubyry jelilerin qaıta jańartý jumystary aıaqtalyp keledi
Almaty ákimi Erbolat Dosaev Bostandyq aýdany Markov kóshesindegi ál-Farabı dańǵylynan Ǵabdýllın kóshesine deıingi sý qubyry jelilerin qaıta jańartý barysymen tanysty, dep habarlaıdy almaty-akshamy.kz.
Bul ýchaskedegi qubyr 50-shi jyldardyń sońynda paıdalanýǵa berildi. Jeliler 100% tozǵan, tek sońǵy eki jylda ýchaskede 20 apattyq jaǵdaı oryn aldy.
1,2 km sý qubyry jelilerin rekonstrýksıalaý jumystary 2023 jyldyń tamyzynda bastalyp, sol jyldyń sońyna deıin aıaqtalýy kerek edi. Alaıda merdiger uıym merziminde aıaqtamady, osyǵan baılanysty kompanıany memlekettik satyp alýdyń jaýapsyz qatysýshysy dep taný týraly sotqa talap aryz berildi. İs qaralyp jatyr.
Qurylys-montaj jumystary 2024 jyldyń naýryzynda qaıta jandandy, 2024 jyldyń maýsymyna aıaqtalady dep josparlanǵan.
Qala basshysy merdigerge merzimdi buzǵany jáne mindetine salǵyrt qaraǵany úshin sógis jarıalap, «endi jaýapsyz merdigerlermen jumys istemeımiz» dep eskertti.
Erbolat Dosaev jaýapty tulǵalarǵa merdigerdiń mindettemelerdiń sapaly ári ýaqytyly oryndalýyn qatań baqylaýdy qamtamasyz etýdi tapsyrdy.
Sondaı-aq, megapolıs basshysy qurylys júrgizý kezinde tártip saqtamaǵany úshin eskertý jasady.
Osy ýchaskedegi sý qubyry jelilerin qaıta jańartý 43 kóppáterli úı men 6 ákimshilik ǵımaratty sýmen qamtamasyz etedi.
Jumys barysynda tutynýshylardyń sýmen jabdyqtalýy toqtatylǵan joq. Jol tósemi qazirgi shart aıasynda qalpyna keltiriledi. Sý qubyry jelisin qaıta jańartý «Almaty Sý» MKK menshikti ınvestısıalyq baǵdarlamasy sheńberinde júrgizildi.