Apatty aǵashtar – aýdandaǵy ótkir másele.
Almatyda Áýezov aýdany turǵyndarynyń ótinishine oraı apatty aǵashtardy sanıtarlyq kesý boıynsha baspasóz týry ótti, dep habarlaıdy Almaty-akshamy.kz.
Áýezov aýdanynyń turǵyndary apatty aǵashtardy sanıtarlyq kesý úshin jergilikti atqarýshy organdarǵa júgindi. Barlyǵy 247 ótinish berildi.
Baspasóz týry barysynda BAQ ókilderine sanıtarlyq kesýge arnalǵan ýchaskeler kórsetildi. Bul – aýla ishindegi aýmaqtar men kósheler.
«Apatty aǵashtar – aýdandaǵy ótkir másele. Ásirese, qazir aýlalardy kúrdeli jóndeýden ótkize bastaǵan kezde. Biz ákimdikten apatty aǵashtardyń butaqtaryn kesýdi suradyq», - dedi aýdan turǵyny Svetlana Tıtova.
Sanıtarlyq kesýdi jasyl jelekterdi otyrǵyzý jáne kútip ustaý jónindegi merdigerlik uıymdar júrgizedi. Áýezov aýdany ákimdiginiń ekologıa bólimi baqylaýdy júzege asyrady. Aýdanda barlyǵy 254 764 aǵash bar, onyń 66 825-i sanıtarlyq kesýge, al 6287-i kesip tastaýǵa jatady.
«Qazirgi ýaqytta aýlalardaǵy apatty aǵashtardyń qýraǵan butaqtaryn sanıtarlyq kesý jumystary júrgizilýde. Aǵash kesýdi bastamas buryn, ár aýlada turǵyndarmen kezdesý ótedi, olardyń pikirleri jumys kezinde eskeriledi. Úı ıelerniń bárin ózderi jasaýǵa qarajattary men múmkindikteri bola bermeıdi. Bıylǵy kóktemde qar men muz erigen kezde 200-ge jýyq aǵash qulaǵany, sonyń saldarynan 17 kóliktiń zaqymdanǵany tirkeldi. Apatty aǵashtardy kesý jumystary halyqtyń ómirine, densaýlyǵyna qaýyp tóndirýdiń ári jeke múlikke zıan keltirýdiń aldyn alady», - dedi Áýezov aýdandyq qorshaǵan ortany qorǵaý jáne ekologıa bólimshesiniń basshysy Álızat Seıtbaev.
Sarapshylardyń aıtýynsha, sanıtarlyq kesý aǵashtardyń pishinin jaqsartý, ósimdikterdiń ósýin, damýyn jáne onyń uzaq gúldenýin retteý úshin jasalady.
«Kesýdiń 3 túri bar: sanıtarlyq, jasartý jáne qalyptaý. Sanıtarlyq kesý jyl saıyn jáne kúntizbelik jyl ishinde júrgizilýi kerek. Ol aýrý, kepken, synǵan, salbyrap turǵan, zaqymdalǵan, sondaı-aq aǵashtyń basyndaǵy qýraǵan butaqtarǵa júrgiziledi. Al aǵashtardy jasartý úshin kesý aǵash jyl saıynǵy ósýdi toqtatqan kezde jasalady. Qalyptyq kesý aǵashtyń jasandy pishinin jasaý jáne saqtaý úshin júrgiziledi», - dedi A. Bókeıhanov atyndaǵy orman sharýashylyǵy jáne agroormanmelıorasıa QazǴZI Almaty fılıalynyń dırektory Rýslan Ahmetov.