Jalǵan kýálik kórsetken azamat ýaqytsha ustaý ızolátoryna qamaýǵa alyndy.
Almatyda ózin Antıkordyń qyzmetkeri etip kórsetip kelgen turǵyn ustaldy, dep habarlaıdy Almaty-akshamy.kz QR Sybaılas jemqorlyqqa qarsy is-qımyl agenttiginiń baspasóz qyzmetine silteme jasap.
2023 jyly 6 qańtarda Sybaılas jemqorlyqqa qarsy qyzmettiń Ózindik qaýipsizdik departamenti Almaty qalasy PD ÁPB arnaıy batalónynyń qyzmetkerlerimen birlesip, jolda júrý erejelerin buzǵany úshin ákimshilik jaýapkershilikke tartylmaý maqsatynda ózin Sybaılas jemqorlyqqa qarsy qyzmettiń qazirgi qyzmetkeri retinde tanystyrǵan 1987 jyly týǵan azamat Ulan Raıdy áshkereledi.
Qujattardy tekserý barysynda quqyq buzýshy QR Memlekettik qyzmet isteri jáne sybaılas jemqorlyqqa qarsy is-qımyl agenttigi departamenti qyzmetkeriniń jalǵan qyzmettik kýáligin kórsetken.
Jalǵan kýálik kórsetken azamat ustalyp, ýaqytsha ustaý ızolátoryna qamaýǵa alyndy. Tergeý jalǵasýda.
Osy azamattyń qatysýymen quqyqqa qarsy is-qımyl faktileri boıynsha qandaı da bir aqparat bolǵan jaǵdaıda, Sybaılas jemqorlyqqa qarsy qyzmettiń Call-ortalyǵyna 1424 nemese 8 (7172) 90-94-08 nómiri boıynsha habarlasýǵa bolady.