Almatyda «AMANAT» partıasy qalalyq fılıalynyń Saıası keńesi Búrosy men máslıhattaǵy depýtattyq fraksıanyń keńeıtilgen otyrysy ótti.
Jıynǵa partıa múshelerimen qatar, qala ákiminiń orynbasary Álisher Ábdiqadyrov jáne qalalyq basqarmalardyń jetekshileri qatysty, dep habarlaıdy
Kezdesý barysynda partıanyń 2023–2027 jyldarǵa arnalǵan Saılaýaldy baǵdarlamasyn júzege asyrýǵa baǵyttalǵan Jol kartasynyń oryndalý barysy jáne 2025 jylǵa arnalǵan jumys josparlary qaraldy. Partıanyń qalalyq fılıalynyń tóraǵasy Stanıslav Kankýrov otyrysty ashyp, partıa bastamalarynyń kúndelikti ómirde naqty nátıje berýi tıis ekenin atap ótti.
«Bizdiń maqsat – jaı ǵana jospar quryp, esep berý emes. Eń mańyzdysy – turǵyndar osy jumystyń shynaıy nátıjesin kún saıyn sezinýi kerek. Ol úshin naqty iske kóship, halyqpen baılanys ornatý jáne depýtattardyń jeke jaýapkershiligin arttyrý mańyzdy», – dep atap ótti «AMANAT» partıasy Almaty qalalyq fılıalynyń tóraǵasy Stanıslav Kankýrov.
Sonymen qatar, Jol kartasy aıasynda basqarlmalar esebi tyńdaldy. Olar Jol kartasynyń túrli baǵyttary boıynsha atqarylǵan jumystar jaıly baıandap, alda turǵan mindetterge toqtaldy.
Otyrys barysynda qalanyń áleýmettik-ekonomıkalyq damýyna qatysty birqatar usynystar aıtyldy.
Depýtat Bekbol Ramazan jastardy jumyspen qamtýǵa baǵyttalǵan «Jastar praktıkasy» baǵdarlamasyn jetildirý qajettigin kóterdi. Igor Prosenko ózen arnalarynyń rekonstrýksıasy men «Saıran» kóliniń mańyn abattandyrý jumystary týraly aıtty. Baqytbek Jumabaev qaladaǵy medısınalyq mekemeler qurylysy men jańǵyrtý sharalaryna nazar aýdardy.
Al Altynaı Kobeeva áleýmettik osal toptarǵa arnalǵan «Áleýmettik karta» jobasyn keńeıtý máselesin kóterdi.
Keńeıtilgen otyrys nátıjesinde Jol kartasynyń ár baǵytyna jaýapty depýtattar qaıta bekitildi. Sondaı-aq fraksıanyń 2025 jyldyń birinshi toqsanyndaǵy jumysynyń nátıjeleri usynyldy.
«AMANAT» partıasy aldaǵy ýaqytta da turǵyndarmen keri baılanysty kúsheıtip, naqty bastamalar arqyly ómir sapasyn arttyrý baǵytynda jumysyn jalǵastyrady.