Belgili kompozıtor Altynbek Qorazbaev 75 jasqa toldy.
Respýblıka saraıynda Qazaqstannyń Halyq ártisi, Memlekettik syılyqtyń laýreaty, ánshi-kompozıtor Altynbek Qorazbaevtyń 75 jas mereıtoıyna arnalǵan shyǵarmashylyq keshi ótti, dep habarlaıdy Almaty-akshamy.kz.
Almaty qalasy ákimdiginiń qoldaýymen uıymdastyrylǵan shyǵarmashylyq keshti ánshiniń qurdasy Tuńǵyshbaı Jamanqulov pen shákirti Toqtar Serikov júrgizdi.
Áýezdi án keshi Memleket basshysy Qasym-Jomart Toqaevtyń jáne Almaty qalasynyń ákimi Erbolat Dosaevtyń atynan joldanǵan quttyqtaý hattardy oqyp, mereıtoı ıesiniń ıyǵyna shapan jabýmen bastaldy.
Óner men mádenıet salasyn órkendetýde eleýli úles qosyp kele jatqan kórnekti kompozıtor, belgili qoǵam qaıratkeri Altynbek Qorazbaevtyń mereıtoılyq konsertine ónersúıer qaýymmen birge Qazaqstan Respýblıkasynyń Mádenıet jáne sport mınıstri Asqat Oralov, Premer-Mınıstrdiń orynbasary Altaı Kólginov, Almaty qalasy ákiminiń orynbasary Arman Qyryqbaev, sondaı-aq óner tarlandary men zıaly qaýym ókilderi keldi.
Kesh barysynda úlken ekrannan ánshiniń halyq arasynda keńinen tanylǵan ánderiniń dúnıege kelý tarıhyna toqtala otyryp túsirilgen «Aq degelek» derekti fılminen úzindiler kórsetildi. Maqpal Júnisova, Baǵdat Sámedınova, «MýzART» toby, Toqtar men Beıbit, Alma Amanjolova, Álisher Kárimov, Ernar Aıdar, Tóreǵalı Tóreáli, Qyrǵyzstannan kelgen ánshiler jáne ózge de estrada ánshileri Almaty aspanyn ánge bólep, Altynbek Qorazbaevtyń «Aı-haı, 25!», «Saǵyndym Kenen atamdy», «Ágýgaı, dombyra», «Saǵyndym Almatymdy», «Aqmonshaqty aýylym», t.s.s. kóptegen ánderin naqyshyna keltire oryndady. Al Asanáli Áshimov atamyzdyń uly – kishi Asanálige arnap aıtqan «Qulynym» áni tyńdarmannyń kóńilin tolqytty. Án aıaqtalǵannan soń mereıtoı ıesin quttyqtaǵan Asanáli aǵa:
«Qazaqta aǵasynyń kıimin inisi kıedi. Men myna shapanymdy ózińe syılaımyn», - dep ózi ıyǵyna jamylyp shyqqan shapanyn qaǵyp-qaǵyp jiberip, mereıtoı ıesiniń ıyǵyna japty. Akterlik sheberlikpen aıtylǵan ádemi ázil kórermenniń dý qol shapalaqtaýyna ulasty.
Saǵynyshqa toly, lırıkalyq ánder jazǵan, óziniń qońyr únimen halyqtyń júregine jol tapqan Altynbek Qorazbaevtyń ónerden oıyp alar orny bólek. Onyń shyǵarmashylyǵynda qazaq halqynyń basynan keshken taýqymeti ózine laıyq beınesin tapqan. Ótken ǵasyrda elge tez taraǵan «Qara shal», «Qara kempir», «Qara pıma» ánderi bul sózimizge dálel. Sazgerdiń konsertinde «Qara shal» ániniń jelisimen daıyndalǵan «Qarttar úıi» jaıyndaǵy kórinis te kórermenge erekshe áser etip, tipti, keıbiriniń kózine jas aldyrdy.