QR Densaýlyq saqtaý mınıstrligi arnaıy "jedel járdem" brıgadalarynyń sanyn kóbeıtpek.
Densaýlyq saqtaý mınıstrligi halyqqa shuǵyl medısınalyq kómektiń sapasy men qoljetimdiligin jaqsartý úshin vedomstvonyń «Jedel medısınalyq járdem, onyń ishinde medısınalyq avıasıany tarta otyryp kórsetý qaǵıdalaryn bekitý týraly» 2023 jylǵy 19 qańtardaǵy buıryǵyna ózgerister engizdi, dep habarlaıdy Almaty-akshamy.kz DSM silteme jasap.
Buıryqqa sáıkes jedel járdem brıgadasynyń quramyna paramedık – alǵashqy kómek kórsetý boıynsha qosymsha fýnksıany oryndaı alatyn jáne shaqyrýlarǵa qyzmet kórsetý boıynsha jedel medısınalyq járdem brıgadalarynyń jumysyna qatysa alatyn alǵashqy kómek kórsetý boıynsha kásiptik daıarlyq kýrsynan ótken adam kiredi.
Halyq sany 100 myń adamnan turatyn monoqalalarda jergilikti atqarýshy organdardyń qalaýyna qaraı derbes jedel medısınalyq járdem stansalary uıymdastyrylady.
Dárigerlik brıgadalardyń sany quramyna mamandandyrylǵan (dárigerlik), onyń ishinde balalar qarqyndy terapıa brıgadalary, beıindi brıgadalar (kardıologıalyq, pedıatrıalyq) kiretin brıgadalardyń jalpy sanynyń keminde 25% quraıdy.
Búginde elimizde 1500-ge jýyq jedel medısınalyq járdem brıgadasy jumys isteıdi, onyń 18% - mamandandyrylǵan dárigerlik brıgadalar.
Taldaý kórsetkendeı, qanaınalym júıesiniń aýrýlary men balalardaǵy aýrýlarǵa baılanysty qıyndyqtar jıi kezdesedi.
Sondaı-aq, jedel járdem stansalaryna medısınalyq aqparattyq júıelerge qoljetimdilik beriledi, bul úılestirýshi uıym úshin medısınalyq kómek kórsetýde ıntegrasıany qamtamasyz etedi.
«Jedel járdem stansalary 10 myń jáne odan az halyqqa shaqqanda bir brıgadanyń esebinen brıgadamen jaraqtandyrylatynyn, al medısınalyq-sanıtarıalyq alǵashqy kómek uıymdaryndaǵy JMK bólimsheleri halyqtyń ótinishin eskere otyryp, 35 myń jáne odan az halyqqa shaqqanda bir brıgadanyń esebinen brıgadamen jaraqtandyrylatynyn esterińizge salamyz», - dep habarlady mınıstrlikten.
Dıspecherlerdiń aýyldyq eldi mekenderdegi shaqyrýlarǵa qyzmet kórsetýi úshin aýdandyq qosalqy stansalarǵa mamandar, sondaı-aq jaqyn mańdaǵy medısınalyq uıymdardyń sanıtarıalyq avtokólikteri tartylýy múmkin.
Bul ınovasıalar JMK qyzmetiniń el halqyna shuǵyl medısınalyq kómek kórsetýdiń sapasy men qoljetimdiligin jaqsartýǵa múmkindik beredi.