Almatyda qala turǵyndarynyń mobıldiligin arttyrý maqsatynda kóshe-jol jelisin damytý jumystary jalǵasyp jatyr. Qalalyq mobıldilik basqarmasy ishki magıstraldyq kóshelerdi uzartý jumystarynyń barysy jaıly habarlady.
Búginde Tóle bı kóshesin Iassaýı kóshesinen qala shekarasyna deıin uzartý boıynsha jer telimderin satyp alýǵa baılanysty jol-qurylys jumystary jáne ınjenerlik jelilerdi qaıta qurý júrgizilip jatyr. Uzyndyǵy 4,5 km joba eki ýchaskege bólingen. Jumys 2025 jyldyń sońyna deıin aıaqtalady.
- Bıyl uzyndyǵy 4,3 km bolatyn Hmelnıskıı kóshesin «Qaırat» shaǵyn aýdanynan Talǵar tas jolyna deıin uzartý jáne Raıymbek dańǵylyn Jetisý kóshesinen Talǵar tas jolyna deıin uzartyp salý boıynsha qurylys-montajdaý jumystaryn bastaý josparlanǵan.
- Sonymen qatar, bıyl uzyndyǵy 0,6 km bolatyn Muqanov kóshesin Raıymbek dańǵylynan Maqataev kóshesine deıin uzartý jumystary bastalady. Osy aýmaqtar boıynsha jobalyq qujattama ázirlenip, saraptamada jatyr.
- Jer teliminiń alynýyna qaraı Jubanov kóshesin Momyshuly kóshesinen qala shekarasyna deıin uzartý jumystary júrgiziledi. Joba boıynsha jalpy uzyndyǵy 3,9 km bolatyn 2 kezek qarastyrylǵan. Aıaqtalý merzimi - 2026 jyldyń sońyna deıin.
- Buǵan qosa, bıyl uzyndyǵy 0,3 km bolatyn Ońǵarsynova kóshesin Raıymbek dańǵylyna deıin uzarý jumystaryn bastaý josparlanyp otyr. Qazirgi tańda jobalaý-smetalyq qujattama ázirlenip jatyr.
Esterińizge sala keteıik, buǵan deıin basqarma osy jyldyń sońynda Seıfýllın dańǵyly men Jansúgirov kóshesiniń qıylysyndaǵy jolaıyryq ashýdyń josparlanyp otyrǵanyn habarlaǵan bolatyn. Bıylǵy jyldyń 3-toqsanynda Saıyn kóshesi men Móńke bı kóshesiniń qıylysynda jolaıyryqty paıdalanýǵa berý kózdelgen. Sonymen birge, jyl sońyna deıin Saıyn kóshesin Rysqulov dańǵylynan Aqyn Sara kóshesine deıin jáne Abaı dańǵylyn Stroıtelnaıa kóshesinen qala shekarasyna deıin uzartý jumystary aıaqtalady.