Almatyda Almaty Bar Shift atty biregeı gastronomıalyq joba ótip jatyr, - dep habarlaıdy aqshamnews.kz.
14-20 shilde aralyǵynda Ortalyq Azıada tuńǵysh ret halyqaralyq bar mádenıetine arnalǵan mańyzdy is-shara — Almaty Bar Shift uıymdastyrylyp otyr. Bir apta boıy shahar qonaqjaılyq salasyndaǵy álemdik trendterdi qalyptastyratyn mamandar men erekshe dám izdegen turǵyndar men qonaqtardyń basyn qosatyn alańǵa aınaldy. Almaty Bar Shift jobasynyń avtorlary Almaty Tourism Bureau jáne Shift Project.
Almatyǵa Vashıngtonnan bastap Florensıaǵa, Afınadan Keıptaýnǵa deıingi álemniń túkpir-túkpirinen ataqty kokteıl aptalyǵyn uıymdastyratyn jandar keldi. Olar qazirgi zamanǵy bar mádenıetiniń bet-beınesin jasaıtyndar. Álemniń úzdik barlarynyń qataryna engen World’s 50 Best Bars, Top 500 jáne Michelin gıdi syndy reıtıńterde moıyndalǵan barlardyń bilikti bartenderleri almatylyq bardyń sóresine shyǵyp, ónerin pash etip jatyr.
İs-sharanyń basty maqsaty Almatyny álemdik bar kartasyna shyǵarý, jergilikti bar ındýstrıasynyń ókilderin halyqaralyq kásibı ortamen tanystyryp, ózara tájirıbe almasýǵa jaǵdaı jasaý jáne qaladaǵy servıs deńgeıin jańa bıikke kóterý.
Baǵdarlama kúndizgi bilim berý sabaqtary men keshki qalalyq is-sharalardy qamtıdy. Kúndiz sala mamandary úshin sheberlik saǵattary, dárister men ındýstrıadaǵy ózekti taqyryptardy talqylaý uıymdastyrylady. Keshkisin tanymal barshylar Almatynyń tańdaýly barynda ashyq qonaqtar aýysymyn ótkizedi. Olar jergilikti ónimderdi paıdalanyp, avtorlyq kokteılin daıyndaıdy.
«Gastronomıalyq týrızm — búginde álemdegi eń qarqyndy damyp kele jatqan baǵyttardyń biri. Almatynyń bul saladaǵy áleýeti orasan zor. Mundaı jobalar arqyly biz qalamyzdy óńirdiń gastronomıalyq ortalyǵy retinde tanystyramyz. Munda árkim talǵamyna saı dám men atmosfera taba alady. Eń qýanyshtysy, bizge shyn máninde sheshim qabyldaıtyn ne oǵan yqpal ete alatyn, baratyn oryndardy kópshilikke usynatyn sarapshylar kelip otyr. Mundaı kollaborasıa men birlesken jobalar qalamyzdy Ortalyq Azıadaǵy jetekshi gastronomıalyq baǵytqa aınaldyrýǵa jol ashady dep senemiz», — deıdi Almaty Tourism Bureau ókilderi.
Uıymdastyrýshylardyń aıtýynsha, osyndaı bilim berý kezdesýleri men tájirıbe almasý arqyly Almaty álemdik trendterdi qabyldap qana qoımaı, ózine tán biregeı jobalardy jasaı alatyn shaharǵa aınalyp keledi.