Ymmen sóılesý bilim salasynda ǵana emes, kópshilik ortada ásirese shyǵarmashylyq keńistikterde de keńinen taralyp jatyr. Áleýmettik jelide úlken konsertte tanymal ánshilerdiń ánin erekshe jandarǵa ymmen jetkizip turǵan qyzdyń beınesin kórgen bolarsyz. Jurt onyń áreketine rıza bolyp, estý qabiletinen aıyrylǵan jandar shynaıy alǵystaryn bildirip jatyr. Kóptiń batasyna bólengen arý kim? Aqshamnews.kz tilshisi únsiz álemge til bitirgen qaraǵandylyq arýmen suhbattasty.
Aıdana Japarova - kásibı sýrdoaýdarmashy. Qaraǵandy qalasynyń týmasy, 31 jasta. Búginde ol elimizdegi aýqymdy jobalarǵa at salysyp, qazaqstandyq ártisterdiń áıgili ánderin estı almaıtyn jandarǵa ym tilimen jetkizip otyrady. Óz qyzmetin tegin usynatyn meıirimdi jan, qıyn da qyzyq kezeńderden turatyn ómir joly jaıly tebirene áńgimelep berdi.
"Men estý qabiletinen aıyrylǵan otbasynda óstim"
Aıdananyń ata-anasy - estý qabiletinen aıyrylǵan jandar. Osy sebepten de ol kishkentaı kezinen ym tilin úırenýge májbúr bolǵanyn jáne bul tildiń ol úshin tek sóılesý quraly emes, ómiriniń bir bóligine aınalǵanyn aıtty.
"Ata-anamnyń estý qabileti kishkentaı kezinde joǵalǵan. Sol sebepti sińilim ekeýmiz kishkentaıymyzdan ym tilin ıgerdik. Bul tildi maǵan anam úıretti. Ony úırený tabıǵı proses sekildi ótkendikten, naqty qalaı úırengenim esimde joq. Ákem erte jasymda ómirden ótti. Men anammen únemi birge erip júrip, oǵan kóp dúnıeni aýdaryp berip otyratynmyn. Ymdaý tili - meniń týǵan tilim sekildi boldy" deıdi Aıdana.
sýret: keıipkerdiń jeke arhıvinen
Aıdana qazir otbasyly. Jarymen jáne alty jasar qyzymen Astanada turady. Ol kishkentaı qyzynyń da ym tilin meńgergenin, ájesimen erkin sóılese alatynyn aıtty.
"Arbaǵa tańylyp, qaıta turdym"
Taǵdyr Aıdanaǵa tosynnan synaq syılady. Kolej oqyp júrip, dıplom qorǵaýynyń aldynda densaýlyǵy kenet syr berip, múgedek arbaǵa qalaı baılanǵanyn uqpady.
"Aıaǵymdy basa almaı, sezimtaldyǵym joǵala bastady. Anamdy asa mazalaǵym kelmedi. Óz densaýlyǵyma ózim mán berip kóreıin dep qarala bastadym. Bara-bara aıaqtan múlde júre almaı qaldym. Dárigerler maǵan "ishki qan tamyrlarynyń jarylýy, julyn isigi" degen dıagnoz qoıdy. Solaı men paralıchke shaldyqtym. Qoldarymdy da qozǵalta almaı qaldym. Jaqyndarym barynsha qoldaýbildirdi. Sol kezde maǵan ota jasaǵan hırýrg "bári ózińizge baılanysty, myqty bolsańyz júrip ketesiz" degen edi. Al ómir meni onsyz da myqty etip tárbıelegen edi" dedi ol.
Ómirden myqty bolýdy, qıyndyqqa qarsy júrýdi úırengen ol bul synaqqa da moıymady. Eńsesin tik ustap, bar jigerin jınap, tek alǵa umtyldy.
"Sińilim maǵan úlken qoldaý bildirdi. Men múgedek bolǵym kelmedi. Ózimmen óte qatty jumys jasadym. Julyn isigin ketirý úshin jattyǵýlar qajet boldy. Men ózime maqsat qoıyp, sol maqsatyma jettim. Bir jarym jyldan keıin aıaǵynyń saýsaqtary qozǵala bastady. Bul maǵan kóringen kishkentaı ǵana úmit sáýlesi ispetti kórindi. Men toqtamaı, emimdi jalǵastyrdym. Keıin aqyryndap aıaqqa turyp, júre bastadym" deıdi Aıdana.
Bári qalaı bastaldy?
Aıdana Japarova alǵash ret Dequine esimdi ánshimen óner kórsetti. Ym tilimen án aıtý usynysyn kóp ánshige aıtqanymen, eń birinshi bolyp qoldaǵan Dequine bolǵan. Alǵashqy konsertte Aıdana onyń birden 6 ánin aýdarmamen oryndaǵan. Ol óziniń qobaljyǵanyn, biraq ishteı armanynyń oryndalǵanyna qýanǵanyn jasyrmady.
"Biz Dequine-men tanysyp, birge daıyndaldyq. Ol meniń usynysymdy qabyl alyp, qoldaý bildirdi. Alǵashqy óner kórsetýim bolǵandyqtan óte qatty qobaljydym, sahnada tolyq ashyla almadym. Keıinnen ózge ártister de bul tildiń erekshe tyńdarmandar úshin mańyzdy ekenin túsinip, usynysty qabyldap bastady" deıdi Japarova.
Aıdana ánderdi oryssha ymdap jetkizetinin aıtty. Sebebi burynǵy Keńes Odaǵyna kirgen elderdiń bári tek orys ymdaý tilin qoldanady eken.
"Árıne, eń qıyny - rep. Rep áýenderin aýdaryp jetkizý qıynǵa soǵady. Sondaı-aq, qazaqshadan orysshaǵa aýdarý da óte qıyn. Sebebi qazasha ánderdi sózbe-sóz aýdara almaımyz. Onyń maǵynasyn orysshaǵa aýdaryp baryp jetkizýimiz kerek. Áıtpese mylqaý jandar ony durys túsinbeı qalady" dedi ol.
Aıdananyń tilegi ne?
Aıdana budan bólek Astanada ınklúzıvti teatrda qyzmet etedi. Ol onda qoıylymdardy ym tilinde jetkizip otyrady.
"Teatrda jumys isteýdiń ózi - bir álem. Ár qoıylym ár túrli kúıdi jetkizýge májbúr etedi. Ózimdi sol qoıylymnyń bólshegi sezinemin. Rejısermen jáne akterlermen birge daıyndyq júrgizemin. Sebebi, rejıser qaı jerde qandaı emosıa berý kerektigin aıtyp otyrady. Solaısha men mylqaý jandarǵa qoıylymnyń kóńil-kúıin tutas berip otyramyn" deıdi Aıdana.
Ol kópshiliktiń ystyq yqylasyn shynaıy alǵysyn jetkizdi. Jylap turyp raqmetin aıtyp jatqan erekshe jandardyń rızashylyǵyn kórip, odan saıyn shabyt alyp jatqanyn jasyrmaı, tilek-nıetin de aıta ketti.
"Árbir alǵysyn aıtyp jatqan janǵa raqmetim sheksiz. Eńbegimdi baǵalap jatqan erekshe jandardyń árbir sezimin, ishki oılaryn bárin kózderindegi qýanyshtan kórip, bilip júrmin. Bul meni odan saıyn shabyttandyrady. Aldaǵy ýaqytta osyndaı úlken konsertterde múgedek jandarǵa, ásirese estý qabiletinen aıyrylǵandarǵa jeńildikter qarastyrylsa deımin. Sebebi qazir jastar arasynda mýzykaǵa áýestenetinder kóp. Onyń ishinde mylqaý kisiler de bar. Olardyń sol nıetine, "qoǵamnyń tutas bólshegi bolaıynshy" degen iltıpattaryn biz nazarsyz qaldyrmaýymyz kerek" deıdi Aıdana Japarova.