Almaty jáne demalys dese, kópshiliktiń oıyna birden taý keleri anyq. Taý qalamyzdyń basty kórki degen pikirmen daýlaspaımyz. Sebebi, Almatynyń taý klasterin kúlli el turǵyndary maqtanysh etetini sózsiz. Búgin qalamyzdyń sý aıdyndarymen baılanysty kórikti jerleri de baryn eske salǵymyz keledi. Aqshamnews.kz tilshisi qala turǵyndary arasynda jaqsy tanys 3 demalys ornyn oqyrmandar esine salady:
1. Saıran kóli
Saıran kóli - jasandy sý qoımasy, rekonstrýksıalanǵan tanymal demalys orny.
Sýret: zakon.kz
Búginde munda qaıta qurý aıasynda túbin tazartý, aýmaqty salý jáne abattandyrý jumystary aıaqtalýǵa jaqyn.
Jaǵalaýda oryndyqtar, fýdkorttar, skeıtpark, sport alańdary jáne basqa da demalys oryndary bolady.
Sýret: Zakon.kz
Úlken Almaty ózeninde ornalasqan Saıran kóli 1971 jyly burynǵy qumtas materıaldaryn óndirý kareriniń ornynda quryldy. Qazirgi ýaqytta kóldiń batys jaǵalaýynda abattandyrylǵan qumdy jaǵajaı bar.
2022 jyly bastalǵan qaıta qurý aıasynda kól túbin tazartý jumystary júrgizilip, búginde aıaqtalýǵa taıaý.
2. Áýejaı kóli nemese Kishi Almaty toǵany
Bul toǵannyń resmı ataýy - «Kishi Almaty». Áýejaıǵa jaqyn ornalasqannan keıin, jurtshylyq orny «Áýejaı» kóli dep atap ketken.
Sýret: visitalmaty.kz
Ol 1960-jyldary salynǵan jáne Kishi Almaty ózeninen qorektenedi. Bul — qaladaǵy eń úlken kólderdiń biri, onyń sý kólemi shamamen 1 250 000 tekshe metr, al ortasha tereńdigi — 8 metrge jýyq. Keńes zamanynda bul kól almatylyqtardyń shomylyp, jaǵajaıda demalatyn tanymal oryndarynyń biri bolǵan.
Búginde kólge shomylýǵa resmı túrde tyıym salynǵanymen, ol kóptegen turǵyndar úshin demalys orny retinde qala berýde. 2024 jyly kól túbin tazartý jumystary júrgizilip, onyń ekologıalyq jaǵdaıy jaqsardy. Áýejaı kóli bıoalýantúrlilikti saqtaý úshin de mańyzdy, sebebi onyń mańynda túrli qustar men janýarlar mekendeıdi.
3. Pervomaıskıe prýdy
Bul — Almaty qalasynyń mańyndaǵy demalys aımaǵy. Bul — birneshe sý aıdynynan turatyn keshen, 2017 jyly qaıta jóndelip, abattandyrylǵan. Qazirgi tańda bul jer jaǵajaı demalysyna arnalǵan tanymal oryndardyń biri sanalady. Munda jaǵajaılar, meıramhanalar, dámhanalar, balalar alańdary, voleıbol alańdary jáne sýǵa baılanysty atraksıondar bar.
Sýret: vıdeodan skrın; pervomayskie_prudi ınstagram paraqshasynan
Demalys aımaǵy qala qarbalasynan alystap, tabıǵat aıasynda tynyǵyp, jaıly demalýǵa bolatyn oryn.
Bul toǵandar 1960-jyldary Tereńqara ózenine bógetter salý arqyly jasalǵan. Bastapqyda olar egistik alqaptaryn sýarý, sý qoryn retteý jáne balyq ósirý maqsatynda paıdalanylǵan. 2017 jyly júrgizilgen aýqymdy qaıta qurý jumystarynyń nátıjesinde bul aımaq demalys ornyna aınaldy.
Sýret: restolife.kz
Ásem qala - Almaty san alýan tabıǵat kórinisterine baı. Joǵaryda atalǵan demalys oryndarynda áli de bolyp kórmeseńiz, aldaǵy demalys kúnderin sý aıdyndarynyń jaǵasynda esten ketpesteı ótkizýge bolady. Biraq sý jaǵasynda qaýipsizdikti esten shyǵarmaǵan abzal.
Oqys oqıǵa bolmas úshin, qutqarýshylar usynǵan saqtyq sharalaryn eske salamyz.
- Sýdyń jaǵasynda balalardy qaraýsyz qaldyrmańyz;
- Júze almasańyz, sýǵa tereńdep boılamańyz;
- Sýǵa túskende bir-birińizden kóz jazyp qalmańyz;
- Arnaýly belgi qoıylǵan jerden alysqa uzamańyz;
- Kópirden, jaǵadan, qaıyqtan sýǵa sekirmeńiz;
- Túnde de sýǵa túspeńiz.
Demalystaryńyz oıdaǵydaı ótsin!