Almaty ákimi Erbolat Dosaevtyń kezdesýi barysynda turǵyndardyń biri jergilikti áleýmettik qyzmetter ortalyǵy qyzmetkerleri jalaqysynyń deńgeıin arttyrýǵa baılanysty máseleni qozǵady, dep habarlaıdy aqshamnews.kz
Óz kezeginde Erbolat Dosaev bıylǵy jyly alǵash ret áleýmettik qamsyzdandyrý jáne bilim berý salasynyń ákimshilik jáne kómekshi personalynyń, sondaı-aq vedimistik baǵynysty áleýmettik mekemeler qyzmetkerleriniń jalaqysy 30% - ǵa artqanyn atap ótti.
«Meniń bastamamdy qalalyq máslıhat depýtattary qoldady, ol úshin men olarǵa rızamyn. Meniń oıymsha, alǵashqy qadamdar jasaldy jáne osylaısha biz adamdardy óz oryndarynda, ásirese áleýmettik qyzmet kórsetý ortalyqtarynda jaqsy jumys isteýge yntalandyrdyq. Jyl saıynǵy qarjylandyrý únemi artyp keledi, Men ony qadaǵalap otyramyn», - dedi Erbolat Dosaev.
Esterińizge sala keteıik, aǵymdaǵy jyldyń 20 naýryzynda qalalyq máslıhattyń kezekti otyrysy ótti. Almaty ákimdigi 2025 jylǵa arnalǵan alǵashqy naqtylanǵan búdjettiń jobasyn engizdi, ol jalpy áleýmettik baǵdarlanǵan bolyp qala beredi. Áleýmettik saladaǵy shyǵyndar búdjettiń jalpy shyǵyndarynyń 40%-yn quraıdy.
Almaty qalasynyń ákimi Erbolat Dosaevtyń tapsyrmasy boıynsha bul búdjet jobasy áleýmettik qamsyzdandyrý jáne bilim berý salasynyń ákimshilik jáne kómekshi personalyna, onyń ishinde pedagog-psıhologtarǵa, sondaı-aq vedimistik baǵynysty áleýmettik mekemeler qyzmetkerlerine jalaqyny 30% - ǵa arttyrýdy kózdeıdi.
Ósim 20 314 qyzmetkerdi qamtıdy, onyń ishinde býhgalterler, kitaphanashylar, psıhologtar, logopedter, áleýmettik qyzmetkerler jáne tehnıkalyq qyzmetkerler bar. Sondaı-aq 2015 jyldan beri alǵash ret medısınalyq-áleýmettik mekemelerdiń qyzmetkerlerine, medısınalyq personaldy qospaǵanda, laýazymdyq jalaqyǵa 30%-dyq ústemeaqy belgilendi – ony alatyndar 1 632 qyzmetker.