Áleýmettik qyzmet kórsetý úıine túrli qıyn jaǵdaılarǵa tap bolǵan azamattar keletindigi eskerilip, ortalyqta advokat pen psıholog bólmeleri qarastyrylǵan.
Búgin Almaty qalasynyń ákimi Baqytjan Saǵyntaev qalanyń úkimettik emes uıymdary men qoǵamdyq birlestikteriniń ókilderimen birge Áleýmettik qyzmetter úıiniń ashylýyna qatysty, dep habarlaıdy Almaty-akshamy.kz Almaty qalasy ákiminiń baspasóz qyzmetine silteme jasaı otyryp.
Ǵımaratty rekonstrýksıalaý ótken jyly bastaldy. Qysqa merzim ishinde munda «bir tereze» qaǵıdaty boıynsha barlyq áleýmettik qyzmetterdi alýshylarǵa qolaıly jaǵdaılar jasalady. Kórsetiletin qyzmetterdiń jalpy sany 776-ǵa jýyq.
Baqytjan Saǵyntaev memlekettik organdar men qarjy ınstıtýttarynyń ıntegrasıasy áleýmettik qyzmet kórsetýdiń sapasyn jańa deńgeıge kóteretinine senim bildirdi.
«Qalalyqtardy áleýmettik damytý jáne qoldaý – «Almaty-2050» damý Strategıasynda kórsetilgen Almaty ákimdiginiń basty jáne strategıalyq mindeti. Bizdiń maqsatymyz — Almatyny teń múmkindikter ári ınklúzıvti tulǵaǵa baǵyttalǵan ortalyqtanǵan qala jasaý», - dep atap ótti megapolıs ákimi.
Osy maqsatqa jetý úshin áleýmettik baǵdarlanǵan búdjet qalyptasýda, onyń 46%-y bıylǵy jyly áleýmettik salany damytýǵa jumsalatyn bolady.
Bıylǵy jyly áleýmettik qoldaýǵa 25 mıllıard teńge bólinip, 124 myń adam (áleýmettik kómek - 7,1 mlrd., arnaýly áleýmettik qyzmetter - 4,6 mlrd., múgedekterdi áleýmettik qorǵaý - 5,6 mlrd, halyqty jumyspen qamtý - 6,1 mlrd, belsendi uzaq ómir, baqytty otbasy - 954 mln shyńǵa órleý, táýelsiz mektep ómiri – 406 mln teńge) qamtylatyn bolady.
Múmkindigi shekteýli tulǵalardyń esh kedergisiz kirýleri úshin ǵımarat kótergish qurylǵysymen jabdyqtalǵan. Birinshi qabattaǵy keń operasıa zalynda kelýshilerdi Almaty qalalyq áleýmettik ál-aýqat, turǵyn úı saıasaty basqarmalarynyń, Almatynyń jumyspen qamtý ortalyǵynyń, Azamattarǵa arnalǵan úkimettiń «HQKO»-nyń «Zeınetaqy tóleýdiń memlekettik ortalyǵy» AQF-nyń, Almaty polısıasy departamentiniń kóshi-qon qyzmeti basqarmasynyń, Almaty qalasy boıynsha Eńbek komıtetiniń, áleýmettik qorǵaý jáne kóshi-qon departamentiniń keńesshileri qabyldaıdy.
Ekinshi qabatta Almatynyń jumyspen qamtý ortalyǵynyń operasıa zaly jáne bek-ofıs ornalasady, ótinish berýshiler qolaıly jumys oryndaryn, al jumys berýshiler ózderine kerek jumysshylardy taba alady.
Munda kásip tańdaý kezinde kásibı baǵdar berý, kásibı daıarlaý, jumyssyz azamattarǵa qaıta daıarlaý, biliktiligin arttyrý, «Bastaý-Bıznes» baǵdarlamasy boıynsha oqýǵa joldama jáne tegin granttar berý boıynsha keńes berý qyzmetteri usynylady.
Úshinshi jáne tórtinshi qabattarda Almatynyń áleýmettik ál-aýqat basqarmasy, turǵyn úı saıasaty basqarmasynyń páterlerdi bólý bólimi jáne «Adaldyq alańynyń» halyqqa qyzmet kórsetý aımaǵy ornalasady.
Besinshi qabatta Almatynyń turǵyn úı saıasaty basqarmasynyń túrli bólimderi jáne ártúrli sharalar ótkizetin kópbeıindi akt zaly bolady.
Áleýmettik qyzmet kórsetý úıine túrli ómirlik qıyn jaǵdaılarǵa, onyń ishinde kelispeýshilikterge tap bolǵan kóptegen azamattar keletindigi eskerilip, ortalyqta advokat pen psıholog bólmeleri qarstyrylǵan. Balalarmen kelgen qonaqtarǵa yńǵaıly bolý úshin oıyn alańy jabdyqtalǵan.
Buryndary múgedekter áleýmettik qyzmetterdi kórsetetin uıymdarǵa barý úshin úlken qıyndyqtarǵa tap bolatyn. Endi olarǵa qaǵazbastylyq pen ákimshilik kedergiler joıylǵan ári tıisti prosedýralardy iske asyrý jáne barlyq qujattarǵa bir jerden qol qoıý múmkindikteri týyp otyr.
Áleýmettik qyzmet kórsetý úıi damyǵan kólik ınfraqurylymy bar Dostyq dańǵylynyń boıyna ornalasqan, janynda metronyń «Abaı» beketi bar, baǵyttar boıynsha 7 avtobýs jáne 3 troleıbýs júredi. Iaǵnı, qala turǵyndary Áleýmettik qyzmet kórsetý úıine qalanyń kez-kelgen núktesinen bara alady.