QR Premer-Mınıstri Álıhan Smaıylovtyń tóraǵalyǵymen ótken Úkimet otyrysynda avtojol salasyn odan ári damytý jónindegi sharalar qaraldy.
QR Premer-Mınıstriniń resmı aqparattyq resýrsynyń málimetinshk, kólik mınıstri Marat Qarabaev bıyl qurylys-montajdaý jumystarymen 10,7 myń km avtomobıl joldary qamtylǵanyn, onyń ishinde 6,5 myń km respýblıkalyq mańyzy bar trassalar, 4,2 myń km jergilikti joldar ekenin málimdedi. Júrgizilgen jumystardyń qorytyndysy boıynsha respýblıkalyq deńgeıde normatıvtik jaı-kúıdegi joldardyń úlesi 92%-ǵa, jergilikti deńgeıde 87%-ǵa jetedi, dep habarlaıdy Almaty-akshamy.kz.
İri jobalarǵa keletin bolsaq, búginde Úlken Almaty aınalma joly, Qandyaǵash – Maqat jáne Úsharal – Dostyq trassalary boıynsha jumystar aıaqtaldy. Bul rette turǵyndardan túsken shaǵymdardy eskere otyryp, kúsh-jiger 4-5 jylǵa sozylyp kele jatqan negizgi joldarǵa baǵyttalǵan. Bul Taldyqorǵan – Óskemen, Qaraǵandy – Almaty, Merke – Býrylbaıtal, Aqtóbe – Qandyaǵash, Atyraý – Astrahan avtojoldary. Atalǵan jobalar boıynsha eldi mekenderdegi aınalma joldardan basqa, 923 km-de qozǵalys ashyq.
Batys Qazaqstan oblysyndaǵy joldardy kúrdeli jóndeý jobalaryna erekshe nazar aýdarylady. Olardyń ishinde Kaztalovka – Jánibek jáne Ónege – Bısen – Saıhın bar. Qazirgi ýaqytta 220 km boıynsha kólikpen júrýge bolady. Jobalar tolyǵymen 2024 jyly aıaqtalady dep kútilýde.
Batys Qazaqstan oblysynyń ákimi Narıman Tóreǵalıev, Atyraý oblysynyń ákimi Serik Shápkenov jáne Almaty oblysy ákiminiń birinshi orynbasary Nurlan Ábdirahym jóndeý jumystaryn júrgizý jáne jergilikti joldardyń sapasyn arttyrý sharalary týraly baıandama jasady.
Premer-Mınıstrdiń aıtýynsha, kúre joldardy damytý ekonomıkanyń ósý dınamıkasyna oń áserin beredi. Kúre joldardyń keń taralǵan jelisi ishki jáne syrtqy saýdany damytýǵa múmkindik beredi.
«Qazaqstan tolyqqandy kólik-logıstıkalyq habqa aınalýy tıis. Memleket basshysy bizdiń aldymyzǵa osyndaı mindet qoıyp otyr. Ol úshin avtomobıl joldarynyń qurylysy, jol boıyndaǵy ınfraqurylymdy damytý jáne qyzmet kórsetý jobalaryn iske asyrýdy jandandyrý qajet», — dedi Álıhan Smaıylov.
Úkimet basshysynyń sózinshe, 2025 jyldyń sońyna deıin 3,6 myń km joldy kúrdeli jóndeýdi aıaqtaý josparlanyp otyr. Sodan keıin uzyndyǵy 4,7 myń km bolatyn jańa jobalardy iske asyrý bastalady.
«Osylaısha, 2030 jylǵa deıin barlyq halyqaralyq avtomobıl dálizin jańǵyrtý jumystary aıaqtalatyn bolady. Basty másele – jol qurylysynyń sapasyn qamtamasyz etý», — dedi Premer-Mınıstr.
Úkimet basshysy jol sapasynyń nasharlyǵy turǵyndardyń narazylyǵyna sebepshi bolyp otyrǵanyn aıtty. Ásirese, sapasyz jóndeý jumystaryna qatysty aıtylyp jatqan syn kóp. Tek osy jyldyń ózinde memlekettik organdarǵa avtomobıl joldaryna qatysty 19 myńnan astam aryz-shaǵym kelip tústi.
«Mysaly, jol azabyn tartqan Qostanaı oblysynyń turǵyndary “Uzynkól” stansıasy men Troebratskoe aýyly arasyndaǵy ábden tozyp bitken jolǵa qatysty ujymdyq hat jazǵan. Bul jol osy óńirdi kórshiles Soltústik Qazaqstan oblysymen baılanystyrady jáne Reseıge qaraı tranzıttik jol bolyp tabylady. Bıyl Aqtóbe oblysynyń “Juryn” stansıasy men Orqash aýyly arasynda qıyrshyq tas tóselmegen sapasyz jol salynǵan. Taraz qalasynyń turǵyndary Qarasý shaǵyn aýdanynda 1 jyldan astam ýaqyt boıy bitpeı jatqan jol jóndeý jumystaryn aıaqtaýdy talap etip keledi. Mundaı mysaldar barlyq óńirde kóptep kezdesedi», — dedi Álıhan Smaıylov.
Sonymen qatar Úkimet basshysy jergilikti joldardyń sapasyna saraptama jasaý jumystaryn da durys júrgize almaı otyrǵanyn aıtty. Bul rette keıbir óńirler qurylys-montajdaý jumystaryn tehnıkalyq qadaǵalaý tarapynan baqylaýsyz júrgizedi.
Oǵan qosa jol salasynda sheshilmeı kelgen problemanyń biri – bıtým tapshylyǵy.
«Bıtým boıynsha paıdalaný tehnologıasy saqtalmaıdy. Bul da joldardyń sapasyna keri áserin tıgizip otyr. Sonymen qatar ákimdikter qurylys jáne jol boıyndaǵy qyzmet kórsetý obektileriniń jobalaryna arnalǵan jer ýchaskelerin berý ýaqytyn sozyp jiberedi. Osy faktorlardyń barlyǵy salany damytýǵa kedergi bolýda. Sondyqtan jol qurylysyna degen kózqarasty ózgertý qajet», — dedi Premer-Mınıstr.
Joǵaryda aıtalǵandardy eskere otyryp, Úkimet basshysy avtomobıl joldaryna qatysty barlyq josparlanǵan jobanyń ýaqytyly iske asyrylýyn qamtamasyz etýdi, bıtýmdy saqtaý ınfraqurylymyn qurý boıynsha sharalar qabyldaýdy, ony saqtaý jáne paıdalaný tehnologıasynyń saqtalýyn baqylaýdy qamtamasyz etýdi tapsyrdy.
Sonymen qatar Úkimet basshysy qurylys jáne jol boıyndaǵy qyzmet kórsetý obektilerin keńeıtý jobalaryna arnalǵan jer ýchaskelerin berý tártibin ońaılatý máselesin pysyqtaý kerektigin aıtty.
«Ákimdikter azamattardan jol sapasyna qatysty kelip túsetin shaǵymdar boıynsha ýaqytyly sharalar qabyldaýy qajet. Óńirlik trassalar – jergilikti atqarýshy organdardyń jaýapkershiliginde. Jol jaǵdaıyna turaqty monıtorıń júrgizip, olardy jóndeý boıynsha shuǵyl sharalar qabyldaý qajet», — dep túıindedi Álıhan Smaıylov.