Abaı atyndaǵy Qazaq ulttyq opera jáne balet teatrynda alǵash ret «Aldar kóse» ertegisiniń jelisimen balet qoıyldy.
Teatrdyń málimetinshe, osydan 30 jyl buryn qazaqtyń kórnekti baletmeısteri Mentaı Tleýbaev pen kompozıtor Almabek Meıirbekov «Aldar Kóse» baletin teatrda sahnalamaq bolǵan. Alaıda, balettiń mýzykasy aıaqtalmaı qalǵan. Araǵa 30 jyl salyp atalmysh baletti Mentaı Tleýbaevtiń uly ári izbasary, Japonıa balet teatrynyń jetekshi balet solısi, baletmeıster Maılen Tleýbaev kórermen nazaryna usyndy, dep habarlaıdy Almaty-akshamy.kz.
"Balette Aldar kóse men basqa da keıipkerlerdiń beınesin ashýda keremet akter ári rejıser Sháken Aımanovtyń «Aldar kóse» fılminiń paıdasy kóp boldy. Sebebi, Sháken Aımanov bul fılmde barlyq keıipkerlerdi jaqsy kórsete bilgen. Sondaı-aq baletti sahnalaýǵa Konstantın Altaıdyń «Aldar kóse» kitabynyń kómegi kóp boldy. Bul kitapta qazaq halyq ertegileriniń negizinde Aldar kóse týraly baıandalǵan. Tapqyr Aldar kóse árqashan meıirimdi, adal adamdarǵa kómektesýge daıyn, al ashkóz, aılaker, jalqaý adamdardy jany súımeıdi. Adam boıyndaǵy bul erekshe qasıetter «Aldar kóse» balalar baletinde kórsetiledi, – dedi Maılen Tleýbaev.
Teatrdyń baspasóz qyzmetiniń atap ótýinshe, jańa premera mýzykasy estilgen sátten kórermen kóńilin baýrap, horeografıasy men ártisterdiń akterlik sheberligi naǵyz ǵajaıyp álemge jeteleıdi.