Bıyl qalada 350 myńǵa jýyq aǵash otyrǵyzý josparlanǵan
Qala ákimdiginiń bastamasymen qolǵa alynǵan ıgilikti iske qala turǵyndary men jekelegen kompanıalar da atsalysýda, dep habarlaıdy Almaty-akshamy.kz «Habar 24» telearnasyna silteme jasap.
Medeý aýdanyndaǵy jańadan salynǵan jol aıryqtyń ortasyna 50 túp aǵashty Qazaqstan qor bırjasynyń ujymy otyrǵyzdy. Bul eń aldymen kópke úlgi bolatyn, qala ekologıasyn jaqsartýǵa arnalǵan saýapty is.
«Bul qala ákimdiginiń ıgilikti bastamasy. Buǵan barlyq kompanıalardy qatysýǵa shaqyramyz. Búgin jańa jol aıryq boıynda 50 túp katalpa aǵashyn ektik. Qalanyń ózge de aýdandaryna kóshet otyrǵyzamyz. Ekologıany jaqsartyp, kóriktendirýge boıynsha óz jobalarymyzda da júzege asyramyz»,-deıdi Qazaqstan qor bırjasy basqarma basshysynyń orynbasary Andreı Salúk.
Áýezov aýdanynda jalǵasqan naýqanǵa qala turǵyndary belsendi qatysty. Munda aqqaıyń men qaraǵan kóshetteri egildi. Sharaǵa qatysqan barlyq turǵynǵa aǵash kútimi jóninde málimet jazylǵan aqparattyq paraqshalar taratyldy.
«Áleýmettik jelide osy jasyl ekonomıka basqarmasynyń aksıalaryn kórip, ótinish jibergen bolatynbyz. Osy ótinishimizdi qabyldap, aýlamyzǵa 49 aǵash kóshetin berdi. Mine, búgin kórshilerimizben shyǵyp, aýlamyzǵa aǵashtardy otyrǵyzyp jatyrmyz. Úlken rahmet!»,-deıdi qala turǵyny Gúlmıra Muhamanova.
Biz qalada aǵash egý naýqany bolatyny jóninde aldyn-ala habarlaǵanymyzda turǵyndardan óte kóp ótinish tústi. Ár ótinish boıynsha kóshet egiletin aımaqtardy kórip, tańdaý jasadyq. Sharanyń maqsaty da bul iske turǵyndardy tartý bolatyn. Al egilgen kóshet kútimin, jaıqalyp ósýin turǵyndar qadaǵalaıtyn bolady. Bul aıda qala aýmaǵynda eki myńǵa jýyq túrli aǵash egiledi»,-deıdi Jasyl ekonomıka basqarmasynyń basshysy Natalá Levınskaıa.
Sondaı-aq emen, terek, shaǵan aǵashtarynyń jas taldary Saıaly men Shuǵyla yqshamaýdandaryna da otyrǵyzyldy. Bıyl qalada 350 myńǵa jýyq aǵash otyrǵyzý josparlanǵan. Onyń 64 myńy kóktemde egilgen.