3 maýsymda QR Prezıdenti janyndaǵy Adam quqyqtary jónindegi komısıa Eýropadaǵy qaýipsizdik jáne yntymaqtastyq uıymynyń (EQYU) Astanadaǵy Baǵdarlamalar Ofısiniń, Ortalyq Azıadaǵy Shekaralardy basqarýǵa járdemdesý baǵdarlamasynyń (BOMKA) jáne Almaty qalasy ákimdiginiń qatysýymen memlekettik qyzmetshilerge, ÚEU ókilderine jáne Almaty qalasynyń jurtshylyǵyna arnap «Qazaqstandaǵy adam quqyqtaryn qorǵaýdyń ulttyq jáne halyqaralyq tetikteri» taqyrybynda oqytý semınar-trenıngin ótkizdi.
Semınar-trenıngke Almaty qalasynyń jergilikti quqyq qorǵaý jáne sot organdarynyń, halyqty áleýmettik qorǵaý, bilim berý, densaýlyq saqtaý jáne mádenıet mekemeleriniń basshylary men qyzmetkerleri, sondaı-aq advokatýra ınstıtýtynyń, azamattyq qoǵam jáne jastar uıymdarynyń ókilderi, sondaı-aq Almaty qalasyndaǵy joǵary oqý oryndarynyń stýdentteri men magıstranttary qatysty.
Semınar-trenıng tyńdaýshylarynyń aldynda Almaty qalasy ákimdiginiń Qoǵamdyq damý basqarmasynyń basshysy Aıdar Esenbekov, QR Prezıdenti janyndaǵy Adam quqyqtary jónindegi komısıa tóraǵasynyń orynbasary Tastemir Ábishev, Eýropadaǵy qaýipsizdik jáne yntymaqtastyq uıymynyń Astanadaǵy Baǵdarlamalar Ofısi Basshysynyń mindetin atqarýshy Iýrıı Fenopetov myrza jáne Ortalyq Azıadaǵy Shekaralardy basqarýǵa járdemdesý baǵdarlamasynyń (BOMKA) óńirlik menedjeri Marıs Domınsh myrza quttyqtaý sóz sóıledi.
Semınar-trenıngte Qazaqstan Respýblıkasyndaǵy adam quqyqtaryn qorǵaýdyń ulttyq jáne halyqaralyq júıesi zerdelendi. Adam quqyqtary jónindegi ulttyq mekemelerdiń sot jáne quqyq qorǵaý organdarymen, basqa da memlekettik organdarmen, sondaı-aq halyqaralyq uıymdarmen jáne azamattyq qoǵam ınstıtýttarymen ózara is-qımyl tetikteri qaraldy.
Semınarda Qazaqstan Respýblıkasy azamattarynyń, sondaı-aq Qazaqstan aýmaǵynda turaqty nemese ýaqytsha turatyn ózge de adamdardyń azamattyq, eńbek, áleýmettik-ekonomıkalyq jáne mádenı quqyqtaryn qorǵaýdyń ózekti máseleleri qaraldy. Tyńdaýshylar azamattardyń óz quqyqtaryn sotta jáne sottan tys qorǵaý, azaptaýlardan jáne qatygezdik pen jazanyń basqa túrlerinen, kemsitýshilikten erkin bolý, bilikti zań kómegin alý konstıtýsıalyq quqyqtaryn iske asyrý tetikterimen tanysty.
Tyńdaýshylar sondaı-aq azamattar men ózge de adamdardyń aqparat alýǵa, bilim alýǵa, áleýmettik qyzmet kórsetýge, kásipkerlik qyzmetti júzege asyrýǵa konstıtýsıalyq quqyqtaryn iske asyrý tetikterimen, sondaı-aq qoǵamdaǵy yqtımal eńbek jáne áleýmettik janjaldardyń aldyn alý jáne sheshý tetikterimen tanysty.
Budan basqa, semınarda turmystyq zorlyq-zombylyqqa jáne adam saýdasyna qarsy is-qımyl salasyndaǵy adam quqyqtaryn, sondaı-aq áıelder men balalardyń, múgedektigi bar adamdardyń quqyqtaryn qorǵaýdyń ózekti máseleleri talqylandy.
Komısıa músheleri T.Ábishev, S.Jarkenova, Z.Baısaqova jáne Sh.Hasanova tyńdaýshylarǵa adamnyń jáne azamattyń quqyqtary men bostandyqtary, sondaı-aq azamattardyń memleket pen qoǵam aldyndaǵy mindetteri týraly naqty mysaldarmen aıtyp berdi.
Máselen, Komısıa tóraǵasynyń orynbasary Tastemir Ábishev óz sózinde jergilikti halyqtyń adam quqyqtary men bostandyqtary, adam quqyqtaryn qorǵaýdyń sot jáne sottan tys tetikteri, Qazaqstan Respýblıkasy azamattarynyń jeke shaǵymdary men habarlamalaryn qaraýdaǵy BUU-nyń sharttyq organdary qyzmetteriniń negizgi qaǵıdattary týraly habardar bolý deńgeıin arttyrý, sondaı-aq qoǵamnyń barlyq toptarynyń quqyqtyq mádenıet deńgeıin arttyrý úshin Qazaqstannyń óńirlerinde adam quqyqtary jónindegi oqytý semınar-trenıngteriniń mańyzdylyǵyn atap ótti.
Budan ári Komısıa tóraǵasynyń orynbasary Qazaqstan Prezıdenti Qasym-Jomart Toqaevtyń zańnyń ústemdigine jáne qazaqstandyq qoǵamda quqyqtyq mádenıetti ornatýǵa, Qazaqstan Respýblıkasynyń halyqaralyq mindettemeleri aıasynda azamattardyń konstıtýsıalyq quqyqtaryn saqtaýǵa mańyzdy mán beretinin erekshe atap ótti.
Eýropadaǵy qaýipsizdik jáne yntymaqtastyq uıymynyń Astanadaǵy Baǵdarlamalar Ofısi Basshysynyń mindetin atqarýshy Iýrıı Fenopetov myrza óz sózinde Qazaqstannyń shalǵaı aýdandary men aýyldaryn qamtıtyn Adam quqyqtary jónindegi komısıa men EQYU-nyń birlesken oqytý semınar-trenıngteriniń biregeıligin atap ótti.
Semınar-trenıng barysynda tyńdaýshylar Birikken Ulttar Uıymynyń adam quqyqtary salasyndaǵy sharttyq organdarynyń baqylaý fýnksıalarymen, BUU qurǵan baqylaý organdarynyń quzyretimen tanysty, BUU tıisti komıtetterinde azamattardyń jeke shaǵymdaryn qaraý tetikterin talqylady.
Semınar-trenıng barysynda qatysýshylar adam quqyqtaryn qorǵaý jáne kótermeleý salasynda tájirıbe almasty. Komısıa músheleri tyńdaýshylardy qyzyqtyrǵan suraqtarǵa jaýap berdi.