Almatyda, Astanada nemese basqa iri qalada páterdi jalǵa alý ońaı emes. Aqshany jalǵan "rıeltorǵa" berip, úısiz qalmaýdyń, aldanyp qalmaýdyń joly bar ma? Bar! Jalǵa páter alǵanda neni este ustaǵan jón? Bul maqalada eń qajet laıfhaktardy toptastyrdyq, - dep habarlaıdy aqshamnews.kz tilshisi.
Aqshany eshqashan aldyn ala aýdarmańyz!
Ádette páter jaldaýǵa kelgende alaıaqtar "bul úıge qyzyǵyp júrgen adam kóp, maǵan qazir belgili mólsherde aqsha aýdarsańyz, úıdi sizden basqa eshkimge jalǵa bermeımin" dep aldaıdy. Men de birneshe ret bul qarmaqqa ilingenmin. Alaıda páterdi jalǵa berýshi aldymen kimge jalǵa bereıin dep jatqanyna kóz jetkizedi. Sondyqtan olar da qyzyǵýshylyǵy bar adamnyń baspanany kelip kórip, kózbe-kóz kelisimge kelgenin qalaıdy. Bir qyzyǵy, alaıaqtar senimge kirý úshin tipti jeke kýáliktiń sýretin de jiberedi, biraq bul olarǵa senýge bolady degen sóz emes.
Laıfhak: Rıeltorǵa nemese menshik ıesine aldyn ala aqsha jibermeńiz! Eń durysy – páterdi óz kózińizben kórip, kelisimshart jasasqannan keıin ǵana tóleý.
Páter ıesi me, álde deldal ma? Anyqtap alyńyz!
Kóp jaǵdaıda páterdi deldaldar ózin páter ıesi retinde tanystyryp, ony jalǵa beredi. Biraq qandaı da bir problema bolsa, deldal zań aldynda jaýap bermeıdi. Sosyn páter ıesi kelip, "bul - meniń páterim, bosatyńdar" dese, dalada qalýyńyz múmkin.
Ne isteý kerek? Páterdiń naqty ıesin anyqtańyz. Ol úshin tehpasporttyń kóshirmesin surańyz.
Mindetti túrde kelisimshart jasańyz
"Qazaqpyz ǵoı, aýyzsha kelise saldyq" degenniń zań aldynda kúshi joq. Eger kelisimshart bolmasa, erteń páter ıesi sizdi kez kelgen ýaqytta qýyp shyǵýy múmkin. Al eger páterde birdeńe búlinse nemese kórshimen janjaldasyp qalsańyz, barlyq jaýapkershilik sizdiń moınyńyzǵa artylady.
Kelisimshartta ne bolýǵa tıis?
- Taraptardyń tolyq aty-jóni men JSN;
- Tólem mólsheri men tóleý merzimi;
- Komýnaldyq qyzmetterdiń kim tóleýi keregi;
- Páterge kimder kirip-shyǵa alatyny;
- Jalǵa alý merzimi men buzý sharttary.
Áleýmettik jeli
Páter ıesimen barlyq hat almasýdy saqtańyz. Qansha aqsha bergenińiz, qandaı kelisimge kelgenińizdiń - bári keıin mańyzdy bolýy múmkin.
Mysaly: "20 000 teńge aldyn ala tólemdi páterdi brondaý úshin jiberdim" degen skrın sizge sotta dálel bolady.
Páterdiń tehnıkalyq kúıin tekserińiz
Esigi jabyla ma? Sýy aǵyp tur ma? Toq júıesi jumys isteı me? Kórshileri tynysh pa? Bul suraqtardy naqtylap alyńyz.
Neni tekserý kerek?
- Ystyq/sýyq sý;
- Gaz plıtasy;
- Jýynatyn bólme (sýdyń aǵýy, ıisi);
- Tereze men esiktiń tutqalary;
- Wi-Fi.
Baǵaǵa durys "baǵa" berińiz
Páter baǵasy tym arzan bolsa, demek munda bir shıkilik bar nemese alaıaqtar sizdi san soqtyryp ketýi múmkin. Ádette, páter baǵasy ortasha naryqtaǵy baǵadan 30-40 paıyzǵa arzan bolsa, demek bul - alaıaqtar.
Laıfhak: Krisha.kz, Olx.kz sıaqty saıttardan sol aýdannyń, sol tıptegi páterlerdiń ortasha baǵasyn salystyryp qarańyz.
Komýnaldyq tólemderdi anyqta
Kóp jaǵdaıda páter ıesi men jalǵa alýshy komýnaldyq tólemge qatysty suraqty aldyn ala talqylamaıdy. Keıin ekeýiniń arasynda túsinispeýshilik paıda bolýy múmkin.
Páterdi jalǵa berýshi kúmándi bolsa, birden tekserip alǵanyńyz jón. Alaıaqtar óz sqemasyn únemi jańartyp otyrady. Sondyqtan saq bolyńyz!