Memleket basshysynyń tapsyrmasymen «ABAI ULTTYQ MEKTEBI» alǵashqy ulttyq mekteptiń qurylysy bastaldy. Bul joba Qazaqstannyń talantty balalary úshin biregeı bilim berý ortasyn qurýǵa baǵyttalǵan. Almaty qalasyna jumys sapary barysynda oqý-aǵartý mınıstri Ǵanı Beısembaev mektep qurylysymen tanysty, dep habarlaıdy aqshamnews.kz
Mektep 900 oqýshy ornyna arnalǵan jáne munda balalarǵa arnalǵan ınternat, oqytýshylar úıi, kitaphana, sport kesheni qarastyrylǵan. Ol bıylǵy jyly ashylady dep josparlanyp otyr.
Jańa bilim berý uıymynyń konsepsıasy Abaı fılosofıasyna, onyń ishinde «bes asyl is» ıdeıasyna negizdelgen.
«ABAI ULTTYQ MEKTEBI»-niń qurylýy – otandyq bilim berýdi damytýdaǵy eń mańyzdy strategıalyq qadamdardyń biri, ol óziniń shyqqan tegin jaqsy biletin, birneshe tildi meńgergen jáne jahandyq syn-qaterlerge tótep bere alatyn zıalylardyń jańa býynyn tárbıeleýge baǵyttalady», - dep atap ótti mınıstr.
Jobany júzege asyrýdaǵy mańyzdy qadam - «ABAY-Programme» birtutas bilim berý baǵdarlamasynyń ázirlenýi bolyp tabylady. Ol kóptildi, zıaly jáne ulttyq sıpattaǵy tulǵany qalyptastyrýǵa negizdelgen. Mektep sondaı-aq elimizdiń jetekshi pedagogıkalyq joǵary oqý orny – Abaı atyndaǵy qazaq ulttyq pedagogıkalyq ýnıversıtetimen seriktestik ornatady. Yntymaqtastyq aıasynda «Abaı zerthanasy» qurylyp, ol gýmanıtarlyq bilim salasyndaǵy ádistemelik jáne ǵylymı zertteýler ortalyǵyna aınalady.