Almatyda jastar arasyndaǵy jumyssyzdyq deńgeıi bıylǵy jyldyń birinshi toqsanynda 5,2%-dan 4,6%-ǵa deıin tómendedi.
Almatyda jastar úshin taǵy bir jańa tartylys núktesi ashylady
Almaty qalasynyń ákimi Erbolat Dosaev Jetisý aýdanyn aralaý barysynda jastardyń komúnıtı ortalyǵyn ashýǵa arnalǵan jańa ǵımaratta boldy, dep habarlaıdy Almaty-akshamy.kz.
Aıta keteıik, bul aýdandaǵy komúnıtı ortalyqtyń ekinshi fılıaly, birinshisi Botkın kóshesi, 16 mekenjaıynda ornalasqan.
Jalpy aýdany 645 sharshy metr ǵımarat osy jyldyń sáýir aıynda bos jerde salynǵan. Jańa komúnıtı ortalyqty ashý úshin ınklúzıvti tásildi eskere otyryp, jańǵyrtylyp jatyr. Sondaı-aq, ortalyq aýmaǵynda shaǵyn sahna men basketbol alańyn ornalastyrý josparlanǵan. Jumysty 2 aıdyń ishinde aıaqtaý kózdelgen.
Ashylǵan soń munda kreatıvti qoǵamdyq keńistik paıda bolyp, ártúrli memlekettik baǵdarlamalar boıynsha keńes berý, psıhologıalyq jáne zańgerlik kómek, jańa mamandyq alý boıynsha qysqa merzimdi kýrstar syndy jastarǵa qajetti qoldaý sharalary usynylady.
Erbolat Dosaev ár aýdanda jastarǵa arnalǵan komúnıtı ortalyqtar qurý tájirıbesi oń nátıje bergenin atady. Bıylǵy birinshi toqsannyń ózinde 9 myńnan astam jas jumysqa ornalastyryldy, al jastar arasyndaǵy jumyssyzdyq deńgeıi 5,2%-dan 4,6%-ǵa deıin qysqardy.
Qalada Almaty ákimdiginiń jobalyq keńsesi aıasynda barlyǵy 8 komúnıtı ortalyǵy ashylǵan. Olar kúnde, demalys jumys isteıdi. Ortalyqtarǵa kún saıyn orta eseppen 300 adam keledi. 2025 jyldyń sońyna deıin osyndaı 16 ortalyq jumys istemek.
Búginde Almatyda 14 pen 35 jas aralyǵyndaǵy 680 myńǵa jýyq jas turady, onyń ishinde Jetisý aýdanynda 58 myńnan astam jas bar. NEET sanatyndaǵy jastardyń úlesi (bilimi men jumysy joq jastar) aýdanda 6%. Jalpy, megapolıste qurylǵan jastardy áleýmettendirý júıesiniń arqasynda NEET sanatyndaǵy jastardyń úlesi azaıyp keledi.