Halyqtyń áleýmettik osal toptary sanatyna jatatyn 218 kezekte turǵandar páter kiltterin aldy.
Barlyǵy úsh jańa úıde 78 jetim bala, I jáne II toptaǵy 31 múgedek, UOS jeńildikteri boıynsha teńestirilgen 4 ardager, múgedek balalardy tárbıelep otyrǵan 23 otbasy, 72 tolyq emes otbasy jáne 10 zeınetker baspanaly boldy, dep habarlaıdy Almaty-akshamy.kz.
«Búgin qonys toıyn 2011 jyldan 2012 jylǵa deıin kezekte turǵandar atap ótti. Kelesi aptada turǵyn úıdiń jańa sharshy metrine qonystanýdyń kezekti kezeńi josparlanýda», - dedi Almaty qalasy komýnaldyq ınfraqurylymdy damytý basqarmasy basshysynyń orynbasary Ǵalymjan Ábdishuqyruly.
Páterlerdiń kiltterin alý úshin adamdar otbasylarymen, balalarymen jáne nemerelerimen keldi. Olardyń arasynda bir bólmeli páter alǵan kópbalaly ana Maıra Álibaeva da bar.
«Men 75 jastamyn, 11 balanyń anasymyn. Buryn qalada ulymnyń otbasymen birge turdym. Endi men óz páterimde arbaǵa tańylǵan ulymmen birge turamyn. Qala bıligine jańa sharshy metr úshin óte rızamyn», - dedi ol.
Esterińizge sala keteıik, HÁOT sanatyndaǵy kezekte turǵandarǵa kiltterdi tapsyrý aǵymdaǵy jyldyń 25 mamyrynda bastalǵan bolatyn. Sodan keıin úsh úıde kezekte turǵan 124 adam páter aldy. Ekinshi aǵynmen 28 mamyrda kezektegi 164 adam qonystandy. 30 mamyrda taǵy 105 kezekte turǵandar kiltterin aldy. 5 maýsymda 111 otbasy jańa úılerge kóshti. Aǵymdaǵy jyldyń 7 maýsymynda qonys toıyn Medeý sıtı turǵyn úı kesheninde 86 adam atap ótti.
Aıta keteıik, Almaty qalasynyń ákimi Erbolat Dosaevtyń tapsyrmasy boıynsha 2024 jyly qalanyń komýnaldyq turǵyn úı qorynan halyqtyń áleýmettik osal toptarynyń tizimi boıynsha kezekte turǵan azamattarǵa kezektilik tártibimen eki myń jalǵa beriletin páter berý josparlanýda, onyń ishinde 400 páter jetim balalarǵa beriletin bolady.
