Freedom Ticketon platformasyndaǵy bıletter satylymy 2024 jyly eki esege jýyq ósti. Bul týraly Almatyda ótken baspasóz sharasynda Freedom Ticketon onlaın bıletterin satý qyzmetiniń bas dırektory Vıktorıa Torgýnakova málimdedi.
Spıker Qazaqstandaǵy oıyn-saýyq naryǵyna sholý jasady. Ótken jyly qazaqstandyqtar barlyq is-sharaǵa aıyna shamamen 11 801 teńge jumsaǵan. Olardyń oıyn-saýyqqa, mádenıet pen ónerge jumsaǵan jalpy shyǵyny kompanıanyń málimeti boıynsha 2024 jyly 73 mlrd teńgeni qurady. Bul bir jyl burynǵydan 16,1 mlrd teńgege jáne kompanıa bir jyl buryn boljaǵan kórsetkishten 3,8 mlrd teńgege artyq.
Bıletterdi satyp alý platformasyn eń belsendi paıdalanýshylary Astana (50,6%), Almaty (48,1%) jáne Qaraǵandy (33%) qalalarynda. Tranzaksıalar sany boıynsha janr kóshbasshysy bolyp kıno (831 myń), odan keıin konsertter (700 myń) jáne teatrlandyrylǵan qoıylymdar (500 myń) tur. Kınoǵa eń joǵary qyzyǵýshylyqty Pavlodar (68,3%) jáne Shymkent (64,1%) qalalarynyń turǵyndary kórsetti, al sporttyq is-sharalarǵa qyzyǵýshylar Aqtóbede (57,9%) kóp.
Freedom Ticketon málimetteri boıynsha, 2024 jyly kınoprokat oıyn-saýyq naryǵynda jetekshilik etýdi jalǵastyryp, jalpy kiristiń 65,4% quraǵan. Odan keıin gastróldik is-sharalar (23,9%), teatr qoıylymdary (4,08%) jáne sporttyq is-sharalar (2,05%) jarlǵastyrady. 2023 jylmen salystyrǵanda sporttyq is-sharalardyń úlesi kınonyń paıdasyna 4%-dan eki esege derlik qysqarypty. Degenmen, ótkizilgen is-sharalardyń 102% rekordtyq ósimin kórsetken sporttyq is-sharalar boldy. Gastróldik spektáklder de 49%-ǵa ósti. Sonymen qatar, konserttik segment azdap tómendegen – ótken jylmen salystyrǵanda 2% az (2023 jyly 3155 bolsa, ótken jyly 3115). Konsertterdiń sapasy artqanyn da aıta ketken jón: sharalar aýqymy men shaqyrylǵan ártisterdiń mártebesi artty.
Otandyq kıno óz pozısıasyn nyǵaıtty: prokattaǵy qazaqstandyq fılmderdiń sany 2023 jylǵy 72-den 2024 jyly 103-ke deıin ósip, naryqtyń 20%-yn ıelendi. Sheteldik fılmderdiń basymdyǵyna (80%) qaramastan, qazaqstandyq kıno barlyq kasalyq kiristerdiń úshten birinen astamyn, 18,4 mlrd teńge jınaǵan bolsa, sheteldik fılmderden 29,2 mlrd teńge túsken. Jalpy kiriste sheteldik fılmderdiń úlesi 61%, otandyq fılmderdiń úlesi 39% boldy. Jyldyń eń kóp tabys ákelgen fılmi «Moana 2» (1,85 mıllıard teńge), ekinshi orynda qazaqstandyq «Dástúr» fılmi (1,72 mıllıard teńge), úshinshi oryndy «Venom: Sońǵy bı» (1,70 mıllıard teńge) aldy.
Vıktorıa sonymen qatar bıylǵy jyl saıynǵy Freedom Ticketon marapattaryna áser etken ózgerister týraly aıtty. «Jyldyń sheteldik fılmi», «Jyl múltfılmi», «Jyldyń gastróldik oqıǵasy», «Jyl blogeri», «Jyl sportshysy» marapattary alynyp tastaldy. Sarapshy marapat endi ony baǵalaıtyndarǵa jáne saltanatty rásimge qatysýǵa daıyn adamdarǵa baǵyttalǵanyn atap ótti. «Jyl kórmesi», «Jyl murajaıy», «Jyl óner nysany» degen úsh bólimnen turatyn jańa ART nomınasıasy bekitildi.
Jeńimpazdar sáýir aıynda Almatyda ótetin saltanatty marapattaý rásiminde jarıalanady.