Almatyda reıd barysynda 4 kún ishinde kólikti mas kúıinde júrgizgen 21 adam ustaldy
Almaty qalasynyń 78 turǵyny ómir boıyna kólik júrgizýshi kýáliginen aıyryldy, dep habarlaıdy Almaty-akshamy.kz QazAqparatqa silteme jasap.
Almaty qalalyq polısıa departamentiniń málimetinshe, anyqtaý basqarmasy bir jarym jyl ishinde QR QK-niń 346-baby 1-shi jáne 2-shi bólikterinde kózdelgen qylmys belgileri boıynsha 66 qylmystyq isti tergep, sotqa joldaǵan.
«Sot sheshimimen 78 júrgizýshi ómir boıyna kólik quralyn basqarý quqyǵynan aıyryldy. Sonymen qatar, olarǵa 1 jyldan 6 jylǵa deıin bas bostandyǵynan aıyrý jazasyn óteýdiń naqty merzimi taǵaıyndaldy. Qazirgi tańda 8 qylmystyq is sot tergeýinde», - dedi Almaty qalalyq anyqtaý basqarmasynyń bastyǵy Oljas Sháripov.
Ustalǵan júrgizýshiler arasynda qylmysyn birneshe márte qaıtalǵandar da bar. Solardyń biri – A. esimdi azamat. Mamandandyrylǵan patrúldik polısıa batalónynyń ekıpajyna Baıtursynuly men Qarasaı batyr kósheleriniń qıylysynda ustaldy. Narkologıalyq saraptama kórsetkendeı, júrgizýshi ortasha dárejedegi alkogóldik masań kúıde boldy.
«Alǵash ret kólik júrgizý quqyǵynan 2017 jyly aıyryldym, rólge mas kúıde otyrdym. Jaza merzimi bitken joq. 2020 jyly taǵy da mas kúıde ustaldym. Sol kezde men QR QK-niń 346-baby 1-bóligi boıynsha qylmystyq jaýapkershilikke tartyldym jáne ómir boıyna kólik júrgizý quqyǵynan aıyryldym. Biraq, ótken kúni meni taǵy da toqtatty, taǵy masań kúıde boldym. Bul isime qatty ókinemin», - dedi ol.
Eske salsaq, jýyrda Almatynyń jergilikti polısıa qyzmeti reıdtik is-shara kezinde 4 kúnde mas kúıinde kólik aıdaǵan 21 júrgizýshini ustaǵan bolatyn.