Almatyda jyl basynan beri bos oryndar jármeńkesiniń qorytyndysy boıynsha 34,1 myń jas jumysqa ornalasty. Óńirlik komýnıkasıalar qyzmetiniń brıfıńinde Almaty qalasy ákiminiń orynbasary Arman Qyryqbaev aıtyp ótkendeı, onyń ishinde 27 myńnan astamy turaqty jumys oryndaryna, 6,4 myńy ýaqytsha jumys oryndaryna ornalastyrylǵan.
Megapolıstiń barlyq aýdandarynda jyl basynan beri 26 myń adamdy, onyń ishinde NEET sanatyndaǵy jastardy qamtıtyn «Mansap kúnderi» ótkizildi. Qalalyq mansap ortalyǵy 2,4 myń adamdy jumysqa ornalastyrýǵa járdem kórsetti, dep habarlaıdy almaty-akshamy.kz.
Sonymen qatar, ózekti mamandyqtar boıynsha 30 qysqa merzimdi oqytý kýrsy iske qosyldy. 10,2 myń adam oqýdan ótti, onyń 9,2 myńy jumysqa ornalastyryldy, bir myńy taǵylymdamadan ótýde.
Almatyda jastarǵa arnalǵan Jasalmaty.kz portalynda ornalasqan jumys izdeýdiń biryńǵaı platformasy Jobffir365 dep atalady.
«Platformanyń ereksheligi - bul tegin negizde jumys izdep qana qoımaı, sertıfıkat ala otyryp, qysqa merzimdi kýrstardan ótý múmkindigi», - dep atap ótti A.Qyryqbaev.
Búgingi tańda platformany 13,5 myńnan astam adam paıdalandy, 3,7 myń bos jumys orny ornalastyryldy jáne 1,5 myń jumys berýshi tirkeldi. 1,8 myń adam jumysqa ornalastyryldy.
Ákimniń orynbasary óz sózinde atap ótkendeı, sonymen qatar jasóspirimder men jastardyń bos ýaqytyn qamtamasyz etý boıynsha jumystar júrgizilýde. 2023 jyly 8 jastar komýnıtı-ortalyǵy iske qosylady. 2025 jyldyń sońyna deıin olardyń sany 16-ǵa deıin jetkiziledi.
«Bolashaqta ortalyqtar tartymdy orynǵa aınalady, NEET sanatymen jumysty jańa deńgeıge shyǵarady, olardyń jeke esebin júrgizýge múmkindik beredi. Joǵaryda atalǵan sharalar kesheni NEET jastarynyń úlesin 2023 jyldyń 11 aıynda 8,3% - dan 7,3% - ǵa deıin tómendetýge múmkindik berdi. Aǵymdaǵy jyldyń sońyna qaraı 7% - ǵa deıin, 2025 jyldyń sońyna qaraı 5,2% - ǵa deıin jáne 2030 jyldyń sońyna qaraı 4% - ǵa deıin qysqartýdy josparlap otyrmyz», - dep atap ótti A.Qyryqbaev.