Halyqaralyq balalardy qorǵaý kúnine oraı Almaty qalasyndaǵy №59 mektep-gımnazıada «Balalyq shaq máńgi bolsyn!» atty erekshe merekelik shara uıymdastyryldy. Oǵan 300-ge jýyq oqýshy qatysty.
Mádenı is-sharada áppaq fýtbolka men shapka kıgen balalar «Árqashan kún sónbesin!» ánin aıtyp, ujymdyq fleshmob bıledi. Biri sýret salyp, biri án shyrqap, barlyǵy birdeı ortaq bı bılegen oqýshylar merekeniń sánin keltirdi.
Mektep aýlasy da merekege saı bezendirilgen. «Uly dala urpaǵy» atty etnolagerdiń banneri ilingen aýlada kıiz úı de bar.
Fleshmobtyń maqsaty - balalyq shaqtyń jarqyn sátterin beıneleý, bı men ujymdyq áreket arqyly shattyq pen meıirimdilik atmosferasyn qalyptastyrý.
Mektep-gımnazıa dırektory Asan Torǵanbekovtyń aıtýynsha, bul shara Almaty qalasy Bilim basqarmasynyń arnaıy jospary negizinde 22 mamyr men 1 maýsym aralyǵynda ótkizilýde.
"Oqýshylarymyz jazǵy demalysqa kóterińki kóńil-kúımen shyqsyn degen nıetpen osyndaı shara uıymdastyrdyq. Mektep janynan etnolager ashtyq. Oǵan keletin balalar kún saıyn Qarajorǵa bıimen jattyǵý jasap, ulttyq oıyndarǵa qatysady. Mundaı sharalar oqýshylarymyzdyń bos ýaqytyn mazmundy ótkizýge sep bolady. Al jalpy, balalar merekesi – ár balanyń júreginde shattyq pen úmit oıatatyn erekshe kún. Biz jyl saıyn bul meıramdy kóterińki kóńil-kúımen qarsy alyp, shákirtterimizdiń shyǵarmashylyǵyn damytýǵa múmkindik beremiz", – deıdi Asan Erjanuly.
Aıta keteıik, bıyl mektepti 1355 oqýshy aıaqtap otyr. Onyń ishinde 11-synypty – 77 túlek, 9-synypty – 156 oqýshy támamdady. 11-synyptan 7 oqýshy – «Altyn belgige», 4 oqýshy – «Úzdik atestatqa» úmitker. Al 9-synyptardan 25 oqýshy «Úzdik atestatqa» usynylǵan.