Almaty qalasy Jastar saıasaty basqarmasynyń qoldaýymen Jetisý aýdanynda bos jumys oryndarynyń jármeńkesi ótti.
Bul — megapolıstegi úzdik kompanıalardyń ózindegi bos jumys oryndaryn usynyp, yntaly jastarmen tikeleı júzdesip, dıalog ornata alatyn mańyzdy alań. İs-sharaǵa IT, qarjy, bilim berý jáne basqa da salalardaǵy jetekshi kompanıalardyń ókilderi qatysty. Olardyń qatarynda iri korporasıalarmen birge bolashaǵy zor startaptar da bar.
“Aınabulaq-1” yqshamaýdanyndaǵy adam aıaǵy kóp júretin Arbat alańynda ótken jármeńkede jastar óz túıindemesin tapsyryp, HR mamandarymen tikeleı áńgimelesý múmkindigine ıe boldy. Sonymen qatar, jumysqa ornalasýǵa qatysty paıdaly keńester men baǵyt-baǵdar berý úshin arnaıy uıymdastyrylǵan konsýltasıalyq buryshtardyń aldy da bos bolmady.
”Bul — jyl basynan beri qalalyq Mansap ortalyǵy uıymdastyryp otyrǵan jetinshi jármeńke. Búgingi is-sharaǵa qyryqtan astam mekeme qatysty. Eń basty maqsat — osy joba arqyly jumys izdep júrgen jastarǵa qoldaý, jol kórsetý, jumys tabýyna kómektesý. Sondaı-aq, osy kompanıalar ókilderiniń kómegimen sheberlik sabaqtaryn, semınar, dárister ótkizýdemiz. Nátıjesi jaqsy. Negizi, bos jumys oryndary jármeńkesine tek jastar qatysady degen shekteý joq, jumys izdep júrgen eresekter de kelip qatysa alady”, — deıdi Almaty qalalyq Mansap ortalyǵynyń qyzmetkeri Aqarys Tórebekov.