Almatyda polısıa er adamdy qutqaryp qaldy, - dep habarlaıdy aqshamnews.kz Polisia.kz-ke silteme jasap.
Tańǵy ýaqytta jedel basqarý ortalyǵyna Saın dańǵyly men Raıymbek dańǵylynyń qıylysyndaǵy kópirde bir er adamnyń sýısıdke oqtalýy týraly habarlama tústi. Kýágerlerdiń aıtýynsha, belgisiz azamat kópir ústinde turyp, sekirýge árekettengen. Oqıǵa ornyna dereý patrúldik polısıa ekıpajdary jiberildi.
Polısıa qyzmetkerleri kelgende, er adamnyń aýyr psıhoemosıonaldyq kúıde ekenin baıqady. Ol baılanys ornatýdan úzildi-kesildi bas tartyp, ózine qaýip tóndirip turǵanyna qaramastan, polıseıler sabyrlyq tanytyp, oǵan janasý arqyly senim uıalatyp, tildesýge tyrysty. Qaýipti jaǵdaı kezinde oqıǵa ornyna Áýezov aýdandyq polısıa basqarmasynyń basshylyǵy da kelip jetti. Tártip saqshylarynyń úılesimdi jáne kásibı is-qımylynyń arqasynda er adam kózge túspeı jaqyn kelip, qaýipsiz jerge shyǵaryldy.
"Basty maqsat – adam ómirin aman saqtaý. Mundaı sátterde ár sóz, árbir áreket sheshýshi ról atqarady. Qyzmetkerlerimizdiń sabyrlylyǵy men kásibıligi naqty ári ýaqytyly sheshim qabyldaýǵa múmkindik berdi", – dedi Áýezov aýdandyq polısıa basqarmasy bastyǵynyń orynbasary Dáýren Maılyqbaev.
Qutqarylǵan azamat — Almaty qalasynyń 35 jastaǵy turǵyny. Onyń psıhıkalyq jaǵdaıyn baǵalaý úshin psıhıkalyq densaýlyq ortalyǵyna jetkizildi. Bul oqıǵa bir nárseni aıqyn dáleldedi: polısıa qyzmetkerleri – tek quqyq qorǵaýshylar ǵana emes, qajet bolǵanda óz ómirin qaterge tigip, adam ómirin saqtap qalýǵa árqashan daıyn jandar.