Saýd Arabıasynyń qajylyq jáne umra mınıstrligi bıylǵy qajylyq maýsymynda qajylarǵa balalardy ózimen birge ertip kelýge ruqsat berilmeıtinin jarıalady.
Aqshamnews.kz bul jaıynda Islam.kz-ke silteme jasaı otyryp habarlaıdy.
Saýdıa bıligi mundaı qadamǵa balalardyń qaýipsizdigin qamtamasyz etý úshin baryp otyr. Óıtkeni, qajylyq kezinde qajylardyń keptelisinen janshylyp ólý qateri joǵary. Budan bólek, atalmysh mınıstrlik qajylardyń qaýipsizdigin qamtamasyz etý úshin qosymsha sharalardy qabyldaıdy. Sonyń ishinde qasıetti mekende qajylardyń keptelisin boldyrmaý úshin oryn aýystyrý, baǵyttaý úshin zıatkerlik júıe qoldanylady.
Buǵan qosa, shatyrly lager ınfraqurylymyn jetildirý, t.b. sharalar qolǵa alynady. Bul joly da qajylyq maýsymynda buryn qajylyǵyn ótemegenderge, ıaǵnı, alǵash ret qasıetti paryzyn óteıtinderge artyqshylyqtar beriletin bolady. 2025 jylǵy qajylyq maýsymyna tirkelý resmı túrde ashyq: Saýd Arabıasynyń azamattary men rezıdentteri úshin Nusuk qosymshasy jáne resmı onlaın-portal arqyly tirkelýge bolady.