Qujatqa sáıkes, 2025 jylǵa qaraı qoldanystaǵy BRT jelisi «Shyǵys qaqpasy» polıortalyǵyna deıin uzartylady. Raıymbek dańǵyly boıymen jańa BRT jelisin iske qosý josparda. Osylaısha, júrdek avtobýstar jelisi 40 shaqyrymǵa uzarady, dep habarlaıdy almaty-akshamy.kz
Almaty qalasynyń jańa Bas josparyn ázirleýshi, kólik sarapshysy Roman Barabanovtyń aıtýynsha, tranzıttik-baǵdarlanǵan damý qaǵıdaty (TBD) qoǵamdyq kóliktiń qoljetimdiligin qamtamasyz etýge jáne jeke avtokólikpen júrý qajettiligin aıtarlyqtaı azaıtýǵa múmkindik beredi.
Metro, BRT, LRT (jeńil relsti tramvaı), sondaı-aq bólingen jolaqtar qalanyń belgili bir jerlerinde qalalyq jáne aýdandyq mańyzy bar kólik-aýystyrý toraptarymen (KAT), jergilikti baılanystar deńgeıinde ózara baılanysty bolady, sondaı-aq olarǵa múmkindiginshe veloınfraqurylym (velojoldar, velojolaqtar) jetkiziledi. Sonymen qatar, KAT birqatar avtobýs marshrýttaryn ońtaılandyrýǵa múmkindik beredi»,- dedi ol.
Sarapshynyń sózinshe, tolyqqandy kólik-aýystyrý toraptary Almaty - 2 vokzalynda paıda bolady. Bul Raıymbek batyr metro stansıasyn qoljetimdi etýge, qala mańyndaǵy avtobýstardyń baǵyttaryn Qonaev qalasyna, sondaı-aq Qazaqstannyń basqa qalalaryna elektr poıyzymen ketýge múmkindik bermek. Sondaı-aq Almaty -1 vokzalynyń janynda metroǵa aýysýǵa jaǵdaı jasalady. Al, uzarǵan jeliniń ózi BRT jáne LRT-men túıisetin bolady.
Sonymen qatar, sarapshy jeńil relsti júrdek kólikter jobasy qalaǵa kópten beri qajet ekenin aıtty.
Aldaǵy eki jylda qoldanystaǵy BRT jelisi «Shyǵys qaqpasy» polıortalyǵyna deıin uzartylyp, Raıymbek dańǵyly boıymen jańa BRT jelisi iske qosylady. 2025 jyly Qalqaman metro stansasy paıdalanýǵa berilip, batys baǵyttaǵy kelesi úsh stansanyń qurylysy bastalady. 2027 jylǵa qaraı Tóle bı kóshesiniń boıynda júrdek jeńil relsti joldyń birinshi jelisin iske qosý josparda.
2030 jylǵa qaraı BRT jelilerin Tilendıev, Rozybaqıev, Muqanov, Jumabaev kósheleri men Úlken Almaty aınalma jáne Qulja tasjoly boıymen 30 shaqyrymǵa deıin uzartý josparda. 2035 jylǵa qaraı – Ótegen batyr, Tátibekov, Soltústik aınalma jáne Sholohov kóshesiniń bólikteri qamtylmaq ( 20 shaqyrym).
Al 2040 jyly júrdek avtobýstar jelisi taǵy 12 shaqyrymǵa uzartylady.
Jyldam avtobýs (BRT) jelileri jobasymen qatar metro jelisi de damıdy. Bas jospar boıynsha 2040 jylǵa qaraı metro jelisiniń uzyndyǵy 32 shaqyrymǵa jetpek. Búgingi tańda qoldanystaǵy jeli 13 shaqyrymdy alyp jatyr. Munyń barlyǵy qoǵamdyq kóliktiń qoljetimdiligin qamtamasyz etýge jáne jeke kólikpen júrý qajettiligin aıtarlyqtaı azaıtýǵa múmkindik beredi. Qazirdiń ózinde arnaıy jolaqtardyń kómegimen jaǵdaıdy jaqsartýǵa múmkindik bar.