2024 jyly Almaty qalasynda joǵary tehnologıaly medısınalyq kómek kórsetýge rekordtyq deńgeıde qarjy bólindi.
Almaty turǵyndary mindetti áleýmettik medısınalyq saqtandyrý (MÁMS) júıesi aıasynda eń zamanaýı ári qymbat ota túrlerin tegin alý múmkindigine ıe boldy. Bul týraly óńirlik komýnıkasıalar qyzmetindegi baspasóz konferensıasynda medısınalyq saqtandyrý qorynyń Almaty qalalyq fılıalynyń dırektory İlıas Muhamedjan málimdedi, dep habarlaıdy aqshamnews.kz.
«2024 jyly Almaty qalasynda tek kardıohırýrgıalyq otalarǵa 18,6 mlrd teńge baǵyttaldy. Barlyǵy 6805 ota jasaldy, onyń árqaısysynyń ortasha quny — 2,7 mln teńge», — dedi İlıas Muhamedjan.
Sonymen qatar, qalada 8 mlrd teńgege 4521 neırohırýrgıalyq ota, 7 mlrd teńgege jambas jáne tize býyndaryn aýystyrý boıynsha 4593 ota júrgizilgen. Sondaı-aq, neıro-qan tamyr jáne qan-tamyr júıesine jasalǵan 5 045 otaǵa Qor 6,7 mlrd teńge tóledi. Sonymen qatar, jalpy quny 709,7 mln teńgelik 107 baýyr men búırek almastyryldy.
«Eger qymbat ota túrleri týraly aıtsaq, saqtandyrylmaǵan azamattarǵa mundaı medısınalyq kómek birneshe mıllıon teńgege túsýi múmkin. Olardyń quny adamnyń tólegen jarnasyna baılanysty emes. MÁMS júıesiniń áleýmettik mańyzdylyǵy osynda», — dep atap ótti İlıas Muhamedjan.
Onyń aıtýynsha, eń qymbat otalardyń qataryna júrekke qosymsha qoldaý kórsetetin qurylǵyny ornatý (77,5 mln teńge), júrektiń mıtraldy qaqpaqshasyn almastyrý (17 mln teńge) jáne alogendi gemopoetıkalyq diń jasýshalaryn almastyrý (16,9 mln teńge) kiredi. Bul ota túrleriniń barlyǵy MÁMS júıesi arqyly qarjylandyryldy.