2025 jyly ońtústik astananyń densaýlyq saqtaý salasy búdjeti 344,7 mlrd teńgeni qurap otyr. Onyń 165,1 mlrd teńgesi – MÁMS paketine, qalǵan 179,6 mlrd teńgesi – tegin medısınalyq kómek paketine tıesili. Bul týraly óńirlik komýnıkasıalar qyzmetiniń baspasóz konferensıasynda Medısınalyq saqtandyrý qorynyń Almaty qalalyq fılıaly dırektory İlıas Muhamedjan habarlady.
Aıtýynsha, MÁMS sheńberinde qarjylandyrý deńgeıi ótken jylmen salystyrǵanda 7% ósken.
«Bıyl Almaty qalasy boıynsha 230 medısına mekemesi Qormen kelisimshart bekitken, onyń 138-i – jekemenshik. Qormen jumys isteýge nıet bildirgen jańa klınıkalar sany – 12. Olar negizinen emhanalar men stomatologıalyq klınıkalar.
Kepildendirilgen tegin kómek jáne MÁMS paketteri boıynsha tapsyrys alǵan emhanalar men stasıonarlar tizimin Qordyń msqory.kz resmı saıtynan tabýǵa bolady», - dep atap ótti İlıas Muhamedjan.
2025 jyly qarjynyń basym bóligin ıaǵnı, 46 mlrd teńgesin ambýlatorıa deńgeıinde kórsetiletin medısınalyq kómekke, sonyń ishinde, emhana qyzmetine, 36,9 mlrd teńgesin konsýltatıvtik-dıagnostıkalyq qyzmetterge jumsaý josparlanǵan. Bul baǵytty qarjylandyrý kólemi ótken jylmen salystyrǵanda 23% artyp otyr.
2025 jyly júkti áıelderdi antenataldy baqylaýǵa qosa, MÁMS sheńberinde bala súıýge daıyndalyp júrgen (pregravıdarlyq daıarlyq) erli-zaıyptylarǵa konsýltatıvtik-dıagnostıkalyq kómek qarastyrylǵan. Buǵan Qor 651 mln teńge bóldi. Bul deni saý urpaq ákelýge josparly daıyndyq deńgeıin kóterýge kómektesedi.
Pregravıdarlyq daıarlyq (aldyn-ala daıarlyq) – erli-zaıyptylardyń dúnıege bala ákelýge daıyndyǵy men densaýlyq jaǵdaıyn dıagnostıkalaýǵa arnalǵan profılaktıkalyq jáne emdik sharalar kesheni. Ol «Analar saýlyǵy» memlekettik baǵdarlamasy sheńberinde júrgizilmek.