Almaty máslıhatynyń kezekten tys sesıasy barysynda depýtattardyń qaraýyna 2024-2026 jyldarǵa arnalǵan búdjet jobasy usynyldy, dep habarlaıdy almaty-akshamy.kz
Halyq qalaýlylarynyń aldynda sóz alǵan qala ákiminiń orynbasary Asqar Ámrın 2024 jyly jalpy uzyndyǵy 170 km-den asatyn 12 sýmen jabdyqtaý nysandarynyń qurylysyn aıaqtaý josparlanǵanyn aıtty.
«Oǵan 3,5 mlrd. teńge bólinedi. Jetisý, Alataý, Naýryzbaı jáne Túrksib aýdandarynyń 50 myńnan astam turǵyny qamtylady. Almaly, Áýezov, Medeý, Jetisý jáne Túrksib aýdandarynda 278,8 km sýmen qamtý jáne sý burý jelilerin salýǵa 3,1 mlrd. teńge qarastyrylǵan», - dedi ol.
Ákim orynbasarynyń aıtýynsha, 2024 jyly 1,1 mlrd.teńge somasyna 23 sýmen jabdyqtaý nysanyna jáne 4 elektrmen jabdyqtaý nysanyna JSQ ázirleý aıaqtalady.
Esterińizge sala keteıik, 2024 jylǵa arnalǵan Almaty búdjetiniń jobasy 1,6 trln.astam. teńge, bul rette, qarajattyń 68,4%-y áleýmettik shyǵystarǵa tıesili.