Almatyda 2021–2025 jyldarǵa arnalǵan turǵyn úı qoryn jańartý baǵdarlamasy aıasynda eski úılerdi súrý, turǵyndardy kóshirý máselesiniń qalaı júzege asatyny belgili boldy, dep habarlady Almaty-akshamy.kz.
«Almaty» ÁKK AQ basqarma tóraǵasy Asqar Bilisbekovtiń aıtýynsha, eski úıler súrilip, olardyń ornyna kópqabatty jańa úıler salynady.
Turǵyndar ýaqytsha baspanaǵa kóshirilip, qurylys aıaqtalǵannan keıin olar 7–10 sharshy metrge artyq jańa páter alady. Al qalǵan páterlerdi ınvestorlardyń satýyna bolady.
Almatyda 2021-2025 jyldar aralyǵynda 708 eski úıdi súrip, jańasyn salý josparlanyp otyr. Buǵan qosa, bolashaqta taǵy 709 eski úıdi súrý kezekte tur. Asqar Bilisbekovtiń aıtýynsha, Almatyda eski úılerdiń shoǵyrlanýy aıtarlyqtaı joǵary. Eń mańyzdy núkteler retinde 1930–1975 jyldar aralyǵynda salynǵan 1427 úı tańdalyp alynǵan. Dál qazir júrgiziletin jumystar eki kezeńge bólinip otyr.
Búginde 708 eski úıdi súrip, jańasyn salý josparlanǵan. Olardyń 458-i jeke ınvestısıalar esebinen, 280-i boıynsha jumystar júrgizilip jatyr. Sondaı-aq, búdjettik qaryz esebinen 250 úı jańartylady.
Jalpy, eski úılerdi súrý jáne aýystyrý barlyq turǵyn 100 paıyz kelisim bergende ǵana júzege asady. Óz kezeginde «Almaty» ÁKK AQ basshysy Asqar Bilisbekov Almaty turǵyndaryn osy máselelerdi belsendi talqylaýǵa shaqyrdy. Turǵyndardy májbúrlep úılerdi buzbaıtynyn da eskerte kele, 10 adamnyń bireýi baǵdarlamadan bas tartsa, úıdiń súrilmeıtinin aıtty.