Polısıa Túrkistan oblysynyń 20 jastaǵy turǵynynan mefedronnyń iri partıasyn tárkiledi.
Esirtki satýshysyn ustaý is-sharasyn Býran-050 patrúldik ekıpajanyń kómegimen esirtki qylmysyna qarsy kúres bóliminiń qyzmetkerleri júrgizdi. Kúdikti Toyota Camry kóligimen jolaýshy retinde júrgen.
«Jeke tintý kezinde kúdiktiden quramynda erekshe ıisi bar aq tústi untaq zaty bar 25 býma tárkilendi. Al kóliktiń ishindegi oryndyq astynan osyǵan uqsas 44 baılam tabyldy jáne tárkilendi. Tárkilengen zattarǵa sot-hımıalyq saraptama júrgizilip, onyń nátıjesinde bunyń mefedron esirtki zaty ekendigi anyqtaldy», – dedi Almaty qalalyq polısıa departamenti bastyǵynyń orynbasarynyń mindetin atqarýshy Qýatbek Naýatov.
Atalǵan derek boıynsha sotqa deıingi tergeý amaldary júrgizilip jatyr. QR QK-niń 201-babyna sáıkes ózge aqparat tergeý múddesine oraı jarıa etilmeıdi. QR Konstıtýsıasynyń 77-baby 3-bólimi 1-tarmaǵy, QR QK-niń 19-baby 1-tarmaǵyna saı kez kelgen azamat sot sheshimi zańdy kúshine engenge deıin kinásiz dep sanalady.