Qala ákiminiń tapsyrmasymen mektepte 35 jyl ishinde alǵash ret kúrdeli jóndeý júrgizildi.
Sondaı-aq, ǵımarattyń seısmıkalyq tózimdiligi kúsheıtildi, dep habarlaıdy aqshamnews.kz
Almaty ákimi Erbolat Dosaev Almaly aýdanyna jumys sapary barysynda №136 gımnazıa mektebiniń jańartylǵan ǵımaraty men jeke ınvestısıa esebinen ashylǵan balabaqshany kórdi.
Qazir 750 oqýshy bilim alyp jatqan №136 gımnazıa mektebi 1989 jyly salynǵan. Bilim berý úderisi bıylǵy 2 qazanda qaıta bastaldy.
Almaty ákimi hımıa, bıologıa, fızıka, ınformatıka pánderine arnalǵan jańartylǵan synyptardy qarap shyqty. Barlyq pándik aýdıtorıa ınteraktıvti paneldermen jáne jańa jıhazdarmen jabdyqtalǵan. Sonymen qatar, úıirmeler kabınetteri men sport alańdary jóndelip, mektep aýmaǵy kógaldandyrylyp, qorshaldy. Osylaısha, mektep oqýshylarynyń jaıly demalýyna barlyq jaǵdaı jasaldy.
«Memleket basshysy Qasym-Jomart Toqaev bilim berý júıesine, mektepterdi kúrdeli jóndeý men jańa oqý oryndaryn salýǵa erekshe nazar aýdaryp otyr. Seısmıkalyq tózimdilikti arttyra otyryp, mektepterdi qaıta jóndeý men jańǵyrtý – bizdiń basty basymdyqtyń biri. Biz basqa da bilim berý mekemelerin joǵary sapa standarttaryn saqtaı otyryp, jańǵyrtýdy jalǵastyramyz», – dedi Erbolat Dosaev.
Jalpy, ótken jyly Almatyda seısmıkalyq tózimdilikti arttyrý jumystary aıasynda segiz mekteptiń jóndeýi aıaqtaldy. Megapolıstegi oqýshy oryndarynyń tapshylyǵyn azaıtý maqsatynda Zerdeli shaǵyn aýdanynda bir mektep, túrli aýdandarda bes qosymsha ǵımarat salynýda, sondaı-aq alty mektep kúrdeli jóndeý jáne qaıta jańǵyrtýdan ótip jatyr. Buǵan qosa, «Jaıly mektep» ulttyq jobasy aıasynda 21 oqý ornynyń qurylysy jalǵasýda.
Erbolat Dosaev jumys sapary barysynda barǵan taǵy bir nysan – SANA URPAQ balabaqshasy. Balabaqsha eki turǵyn úı arasyndaǵy birinshi qabatta, jeke dızaın boıynsha ornalasqan. Mekeme 11 topqa arnalǵan jáne jańa tehnologıalarmen jabdyqtalǵan: ınteraktıvti taqtalar, beınebaqylaý kameralary, sondaı-aq balalardyń densaýlyǵyn saqtaýǵa jáne damýyna arnalǵan zamanaýı qural-jabdyqtarmen jabdyqtalǵan. Munda shahmat, qysh óneri, tuz shahtasy, taekvondo, horeografıa, gımnastıka, mýzyka, logoped jáne psıholog kabınetteri bar.
Almaty ákimi atap ótkendeı, bul balabaqsha – «barlyq qoǵamdyq keńistik oılastyrylǵan jańa úlgidegi ortalyq».
Eske salaıyq, mektepke deıingi bilimmen qamtýdy arttyrý maqsatynda bıyl Almatyda mektepke deıingi tárbıe men oqytýǵa memlekettik bilim berý tapsyrysyn ornalastyrý boıynsha 8 577 orynǵa úsh baıqaý ótkizildi. 2025 jyly 1 920 orynǵa arnalǵan segiz mektepke deıingi uıym ashý josparlanyp otyr.