Bostandyq aýdanynda aýla aýmaqtaryn jańǵyrtýdyń jańa standarty eskerilip, jaıaý júrginshiler aımaǵy abattandyryldy
Almatyda «Halyq qatysatyn búdjet» baǵdarlamasy aıasynda taǵy bir qoǵamdyq keńistik retkk keltirildi. Bul Almaty ákimi Erbolat Dosaev jumys sapary kezinde Bostandyq aýdanynyń turǵyndarymen kezdesý barysynda kórip shyqqan jaıaý júrginshiler aımaǵy, dep habarlaıdy aqshamnews.kz.
Orbıta-4 shaǵyn aýdanyndaǵy 6 jáne 7 úılerdiń arasyndaǵy aýmaqtaǵy kóriktendirý jumystary bıyl shilde aıynda bastalyp, osy aıda aıaqtaldy.
Jaıaý júrginshiler aımaǵynyń boıyna shahmat ústeli, sport trenajerleri men vorkaýt aımaqtary ornatyldy. Búldirshinder úshin balalar oıyn alańy jabdyqtaldy. Aýmaqty kóriktendirý, oıyn alańdaryn, sporttyq quraldardy jáne demalys oryndaryn kóbeıtý turǵyndardyń kúndelikti ómirin san alýan ári qyzyqty ete tústi.
Joba aıasynda 1 817 sharshy metr kespe tas, 1 704 sharshy metr asfált jabyndysy, 840 sharshy metr rezeńke jabyndy tóselip, 175 metrlik gabıon qurylysy salyndy jáne 42 kóshe shamy ornatyldy.
«Halyq qatysatyn búdjet» jobasy bizge oıymyzdy usynyp, júzege asyrýǵa múmkindik berdi. Jańartý nátıjesinde úılerimizdiń aınalasy aıtarlyqtaı ózgerip, jaıly ári yńǵaıly orynǵa aınaldy», – dedi aýdan turǵyny ákimge alǵysyn bildirip.
Óz kezeginde Erbolat Dosaev shahar turǵyndary úshin jaıly qalalyq ortany damytý jumystary jalǵasatynyn atap ótti.
«Joba aýlalyq keńistikterdi jańǵyrtýǵa arnalǵan jańa standarttardy eskere otyryp júzege asyryldy. Qalanyń jospary aıasynda eresekter men balalarǵa arnalǵan jeke aımaqtary bar aýmaqtardy qaıta qurý jumystary qarastyrylǵan», – dedi qala ákimi turǵyndarmen kezdesý kezinde.
Aýdan turǵyndarynyń ótinishimen Erbolat Dosaev jaıaý júrginshiler aımaǵy boıyna beınebaqylaý kameralaryn ornatýdy tapsyrdy.
Sondaı-aq aýdan ákimine aýla aýmaqtaryn tazalaý jumystaryn merdiger uıym tarapynan júıeli jáne tolyq qamtamasyz etý tapsyryldy.
Aıta keteıik, megapolıste «Halyq qatysatyn búdjet» baǵdarlamasy belsendi túrde júzege asyrylyp jatyr. Bıyl bul jobaǵa 18,8 mıllıard teńge bólindi, bul ótken jylmen salystyrǵanda 5,8 mıllıard teńgege kóp. Almaty turǵyndary aýlalardy, qoǵamdyq keńistikterdi kóriktendirý, sport jáne oıyn alańdaryn qurý boıynsha 364 jobany usynýǵa jáne júzege asyrýǵa múmkindik aldy.