Jaqynda Almatyda mopedti alǵashqy tirkeý rásimi júrgizgen edi.
Jas almatylyq kólik quralynyń tehnıkalyq tólqujatyn jáne memlekettik tirkeý nómirin aldy, dep habarlaıdy aqshamnews.kz Polisia.kz-ke silteme jasap.
2025 jyldyń 5 sáýirinen bastap mopedterdi mehanıkalyq kólikterge teńestiretin zańnamalyq túzetýler kúshine enedi. Kórsetilgen kúnnen bastap mopedterdi polısıada tirkeýden ótkennen keıin, A1, A jáne V sanatyndaǵy júrgizýshi kýáligi bar, tehnıkalyq baıqaýdan jáne azamattyq-quqyqtyq jaýapkershilikti saqtandyrýdan ótkennen keıin ǵana paıdalanýǵa ruqsat etiledi. Osyǵan oraı Almaty qalasyndaǵy Mamandandyrylǵan qyzmet kórsetý ortalyqtarynda mopedterdi tirkeý jumystary júrgizilip jatyr.
23 qańtardaǵy jaǵdaı boıynsha memlekettik qyzmet kórsetý kezinde 16 moped tirkeldi. 2024 jyly "Jol qozǵalysy týraly" zańǵa túzetýler engizildi. Negizgi maqsat – mopedterdi paıdalanýdy retteý. Endi moped júrgizýshileri jol qozǵalysynyń tolyqqandy qatysýshylary bolyp sanalady jáne olarǵa barlyq zań talaptary qoldanylady.