Ákimdikte ınklúzıvti qoǵamdy damytý úshin barlyq sharalar qabyldanýda.
2022 jyldyń basynan beri Almatyda turatyn 10 500 múmkindigi shekteýli jan tehnıkalyq ońaltý quraldaryn aldy. Bul týraly Óńirlik komýnıkasıalar qyzmetiniń brıfıńinde jumyspen qamtý jáne áleýmettik baǵdarlamalar basqarmasy basshysynyń orynbasary Danıar Álkebaıuly aıtty, dep habarlaıdy Almaty-akshamy.kz.
Tehnıkalyq ońaltý quraldarynan basqa Almatyda 5200 múgedektigi bar adamdarǵa ymdaý tili mamandarynyń, jeke kómekshilerdiń kómegi túrinde áleýmettik qyzmetter kórsetiledi, sondaı-aq shıpajaılyq emdelýge jiberildi. Ákimdikte ınklúzıvti qoǵamdy damytý úshin barlyq sharalar qabyldanýda.
Spıkerdiń málimdeýinshe, qalada 53 myńnan astam múmkindigi shekteýli jan turady. Onyń ishinde 18 jasqa deıingi múmkindigi shekteýli balalar – 8151.
«Jeke ońaltý baǵdarlamasynyń arqasynda múgedekter ońaltýǵa arnalǵan tehnıkalyq quraldarmen jáne áleýmettik qyzmettermen tegin qamtamasyz etiledi. Qajetti qarajatty «áleýmettik qyzmetter portalynan» ótinim arqyly alýǵa bolady, jekelegen jaǵdaılarda biz memlekettik satyp alý arqyly jeke irikteýdi talap etetin tehnıkalyq quraldardy satyp alamyz», - dep túsindirdi Danıar Álkebaıuly.
Brıfıń barysynda Danıar Álkebaıuly Almaty qalasy ákiminiń tapsyrmasy boıynsha «ınvataksı» kóliginiń sany 39 birlikten 46 birlikke deıin ulǵaıtylǵanyn aıtty. Bul qyzmetti aı saıyn 1500 eresek adam men 357 múmkindigi shekteýli bala paıdalanady.
Almatyda qala basshysynyń bastamasymen «ınvataksı» sany artady. Invataksı avtokólikterin 46-dan 100-ge deıin ulǵaıtý úshin jergilikti búdjetten qosymsha qarjy (244 mln.teńge mólsherinde) bólindi.
Qorytyndylaı kele, vedomstvo ókili Almatyda múgedektigi bar adamdar úshin qoljetimdi ortanyń qalaı quratynyn aıtyp berdi. Qalada 2021-2023 jyldarǵa arnalǵan nysandarǵa qoljetimdiliktiń keshendi jospary júzege asyrylyp jatqanyn eske saldy. Osy keshendi josparǵa sáıkes, bul baǵyttaǵy jumystar kúsheıtildi.