Bıyl barlyǵy 28 myń adamdy qamtý josparlanyp otyr.
Bul týraly búgin Óńirlik komýnıkasıalar qyzmetinde ótken brıfıńte birinshi jartyjyldyqtyń kórsetkishteri týraly Almaty qalalyq jumyspen qamtý jáne áleýmettik baǵdarlamalar basqarmasy basshysynyń orynbasary Danıar Álkebaıuly baıandady, dep habarlaıdy Almaty-akshamy.kz.
Jalpy, jyl basynan beri megapolıstiń 50 myńnan astam turǵynyna áleýmettik tólemder berildi.
«Ataýly áleýmettik kómek 4,2 myńnan astam otbasyǵa, ıaǵnı 20 261 adamǵa 922 mln.teńge kóleminde kórsetildi. Bıyl barlyǵy 28 myń adamdy qamtý josparlanyp otyr. Ómirde qıyn jaǵdaıǵa tap bolǵan azamattarǵa tek materıaldyq kómek pen qoldaý ǵana kórsetip qoımaı, meıirimdilik pen qamqorlyq tanytýǵa tyrysamyz», - dep málimdedi Danıar Álkebaıuly.
Sonymen qatar, eńbekke jaramdy AÁK alýshylar jumyspen qamtý ortalyǵyna jiberiledi, ortalyqta olarǵa jumysqa ornalasýǵa kómek kórsetiledi.
Almaty qalasy jumyspen qamtý jáne áleýmettik baǵdarlamalar basqarmasy basshysynyń orynbasary otbasy múshelerine shaqqandaǵy tabysy eń tómengi kúnkóris deńgeıiniń 70 paıyzynan aspaıtyn jaǵdaıda otbasylarǵa AÁK tólenetinin atap ótti. AÁK-tiń negizgi alýshylary – kóp balaly otbasylar, jalaqysy tómen jumys isteıtin azamattar, zeınetkerler men múgedektigi bar adamdardyń kútimin jasap otyrǵan otbasylar jáne basqa da az qamtylǵan adamdar.
AÁK tólemderden basqa, 1 jastan 6 jasqa deıingi balalar tárbıelenetin otbasylarǵa kepildendirilgen áleýmettik paket te qarastyrylǵan. Jyl basynan beri 996 bala kepildendirilgen kómektiń osy túrimen qamtyldy, al olardyń otbasylaryna 2 853 azyq-túlik qorjyny berildi.
Almaty qalasy ákimdigi tarapynan kórsetiletin qoldaýdyń tizimi turǵyn úı kómegimen tolyqty. Komýnaldyq shyǵyndary otbasynyń jalpy tabysynyń 5 paıyzynan asatyn az qamtylǵan otbasylar búdjet esebinen óteledi. Barlyǵy 1,2 myńnan astam almatylyq otbasyna turǵyn úı kómegi kórsetildi.
Spıker áleýmettik tólemderdiń basqa túrlerimen 14,7 myń qala turǵyny qamtylǵanyn, sondaı-aq 14,3 myń soǵys ardageri men olarǵa teńestirilgen ardagerler de nazardan tys qalmaıtynyn habarlady.